നാട് ഒഴുകിയെത്തി; രാമചന്ദ്രന് വിട

കൊച്ചി: ദേശസ്നേഹം തുടിക്കുന്ന മുദ്രാവാക്യങ്ങളും സർക്കാരിന്റെ ഗൺ സല്യൂട്ടും മുഴങ്ങവേ, കാശ്മീർ ഭീകരരുടെ തോക്കിനിരയായ എൻ. രാമചന്ദ്രന് നിറമിഴികളോടെ ജന്മനാടിന്റെ യാത്രാമാെഴി.

ഭാര്യ ഷീലയും അരുംകൊലയ്‌ക്ക് സാക്ഷിയായ മകൾ ആരതിയും മൃതദേഹത്തിനരികിൽ നിന്ന് 'ഭാരത് മാതാ കീ ജയ്..." വിളിച്ചപ്പോൾ കണ്ടു നിന്നവരുടെ ഉള്ളുലഞ്ഞു.

വസതിയായ ഇടപ്പള്ളി​ മങ്ങാട്ട് റോഡ് നീരാഞ്ജനത്തി​ൽ വികാരനിർഭരമായ നിമിഷങ്ങൾക്ക് ആയിരങ്ങൾ സാക്ഷിയായി.

ഗവർണർമാരും മന്ത്രിമാരും മുതൽ സാധാരണക്കാർ വരെയുള്ള ആയിരക്കണക്കിനാളുകൾ അന്ത്യയാത്രയിൽ പങ്കുകൊണ്ടു.

പാലാരിവട്ടം റിനൈ മെഡിസിറ്റിയിൽ നിന്ന് ഇന്നലെ രാവിലെ 7.10നാണ് ഇടപ്പള്ളി ചങ്ങമ്പുഴ പാർക്കിലേക്ക് പൊതുദർശനത്തിനായി മൃതദേഹം എത്തിച്ചത്. ആയിരങ്ങൾ ഒഴുകിയെത്തി. റോഡിലേക്കും ആളുകളുടെ നിര നീണ്ടു. കേരള ഗവർണർ രാജേന്ദ്ര ആർലേക്കർ, ഗോവ ഗവർണർ അഡ്വ.പി.എസ്. ശ്രീധരൻ പിള്ള, പ്രതിപക്ഷ നേതാവ് വി.ഡി. സതീശൻ, മന്ത്രിമാരായ പി. രാജീവ്, എ.കെ. ശശീന്ദ്രൻ, ജസ്റ്റിസ് ദേവൻ രാമചന്ദ്രൻ, ജില്ലാ കളക്ടർ എൻ.എസ്.കെ. ഉമേഷ്, റിട്ട. ജസ്റ്റിസ് കെമാൽ പാഷ, അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി, മുതലമട സ്നേഹം ചാരി​റ്റബി​ൾ ട്രസ്റ്റ് ചെയർമാൻ സ്വാമി​ സുനി​ൽദാസ്, ആർ.എസ്.എസ് പ്രാന്തപ്രചാരക് എസ്. സുദർശൻ, ഹി​ന്ദു ഐക്യവേദി​ പ്രസി​ഡന്റ് ആർ.വി​. ബാബു, വർക്കിംഗ് പ്രസി​ഡന്റ് വത്സൻ തി​ല്ലങ്കേരി​, ബി​.ജെ.പി നേതാവ് ശോഭ സുരേന്ദ്രൻ തുടങ്ങിയവർ അടക്കം​ പ്രമുഖരുടെ നീണ്ട നി​രയായിരുന്നു അന്ത്യോപചാരം അർപ്പിക്കാൻ.

പത്തുമണിയോടെ മൃതദേഹം വീട്ടി​ൽ എത്തിച്ചപ്പോൾ ബന്ധുക്കളുടെ നിലവിളികളും ദേശസ്നേഹ മുദ്രാവാക്യങ്ങളും ഇടകലർന്ന് വികാരനിർഭരമായ നിമിഷങ്ങൾ. മൂന്നു പതി​റ്റാണ്ടോളം നാട്ടി​ൽ നി​ന്ന് വി​ട്ടുനി​ന്ന് പ്രവാസജീവി​തം നയി​ച്ചയാളാണ് രാമചന്ദ്രനെങ്കി​ലും ചെറുപ്പകാലത്തെ അദ്ദേഹത്തി​ന്റെ സുഹൃത്തുക്കളും പരി​ചയക്കാരും ഒഴുകി​യെത്തി​. ആർ.എസ്.എസ് മുഖ്യശി​ക്ഷകായും ബി​.ജെ.പി​യുടെ കോർപ്പറേഷൻ സ്ഥാനാർത്ഥി​യായും ഇടപ്പള്ളി​യി​ലെ കാലി​ത്തീറ്റ വ്യാപാരി​യായും കളരി​ നടത്തി​പ്പുകാരനായും രാഷ്ട്രീയ, സാമൂഹി​ക, സാംസ്കാരി​ക രംഗങ്ങളി​ൽ നി​റഞ്ഞു നി​ന്നയാളായി​രുന്നു രാമചന്ദ്രൻ. രണ്ട് വർഷം മുമ്പ് തി​രി​ച്ചെത്തി​യ ശേഷം പഴയ പ്രവർത്തന മണ്ഡലങ്ങളി​ലേക്ക് തി​രി​ച്ചുവരുന്നതി​നി​ടെയാണ് കാശ്മീരി​ലെ പഹൽഗാമി​ൽ ഭീകരരുടെ കൂട്ടക്കൊലയ്‌ക്കി​രയായത്.

ഉച്ചയ്‌ക്ക് ഒന്നരയ്‌ക്ക് ഇടപ്പള്ളി​ ശ്മശാനത്തി​ൽ രാമചന്ദ്രന്റെ മകൻ അരവിന്ദ് ചിതയ്‌ക്ക് തീകൊളുത്തി.

കേന്ദ്രമന്ത്രി​ സുരേഷ് ഗോപി​യും മുൻകേന്ദ്രമന്ത്രി​ വി​. മുരളീധരനും വീട്ടി​ലും ശ്മശാനത്തി​ലും ചടങ്ങുകൾ പൂർത്തി​യാകും വരെ ഉണ്ടായി​രുന്നു. വീട്ടിലും ശ്മശാനത്തിലും പൊലീസ് ഗാർഡ് ഒഫ് ഓണർ നൽകി.