കൊല്ലം: ഉൾഗ്രാമങ്ങളിലുള്ളവർക്ക് ഇ ​- സേവനങ്ങളടക്കമുള്ള എല്ലാ സൗകര്യങ്ങളും ഒരു കുടക്കീഴിൽ ലഭ്യമാക്കുന്നതിന് തിരഞ്ഞെടുത്ത ആയിരം റേഷൻകടകളിൽ കേരള സ്റ്റോർ യാഥാർത്ഥ്യമാക്കുമെന്ന് മന്ത്രി ജി.ആർ. അനിൽ പറഞ്ഞു. ചവറ നല്ലേഴത്ത് മുക്കിൽ നവീകരിച്ച സപ്ലൈകോ സൂപ്പർ മാർക്കറ്റിന്റെ ഉദ്ഘാടനം നിർവഹിക്കുകയായിരുന്നു മന്ത്രി.
സ്മാർട്ട് റേഷൻ കടകളുടെ പ്രവർത്തനം കുറ്റമറ്റതാക്കാനുള്ള ചർച്ചകൾ പുരോഗമിക്കുകയാണ്. ഉത്പന്നങ്ങളുടെ ഗുണമേന്മയിൽ പരാതിയുള്ളവർക്ക് ഫോണിലൂടെ വിളിച്ചറിയിക്കാമെന്നും മന്ത്രി പറഞ്ഞു. ആദ്യവില്പന ചവറ ബ്ലോക്ക് പഞ്ചായത്ത് പ്രസിഡന്റ് സന്തോഷ് തുപ്പാശേരി നിർവഹിച്ചു. ഡോ. സുജിത്ത് വിജയൻപിള്ള എം.എൽ.എ അദ്ധ്യക്ഷനായി.