കെ.ഇ.ഇസ്മയിൽ പങ്കെടുത്തേക്കും

ആലപ്പുഴ: സസ്പെൻഷന് വിധേയനായ മുതിർന്ന സി.പി.ഐ നേതാവ് കെ.ഇ.ഇസ്മയിൽ സംസ്ഥാന സമ്മേളനത്തിന്റെ സമാപനത്തോടനുബന്ധിച്ചുള്ള പൊതു സമ്മേളനത്തിൽ പങ്കെടുത്തേക്കുമെന്ന് സൂചന. സസ്പെൻഷനിലായതിനാൽ ഇസ്മയിലിനെ ക്ഷണിച്ചിരുന്നില്ല. സദസിലിരുന്ന് സമ്മേളനത്തിന്റെ ഭാഗമാകാനാണ് തീരുമാനമെന്നറി​യുന്നു. അണികളിൽ ഒരാളായി പ്രകടനത്തിൽ പങ്കെടുക്കാനും ആലോചനയുണ്ട്. തന്നെ ഇഷ്ടപ്പെടുന്ന സഖാക്കളെ നേരിൽ കാണാനും പാർട്ടിയുടെ ശതാബ്ദി സമ്മേളനത്തിന്റെ ഭാഗമാകാനും നാളെ ആലപ്പുഴയിലെത്തുമെന്ന് ഇസ്മയിൽ അടുപ്പക്കാരോട് വെളിപ്പെടുത്തി. മുൻ ദേശീയ എക്‌സിക്യൂട്ടീവ് അംഗമായിരുന്ന ഇസ്മയിൽ നിലവിൽ പാലക്കാട് ജില്ലാ കൗൺസിലിലെ ക്ഷണിതാവാണ്.