കർണ്ണാടക ആവർത്തിക്കും: കുഞ്ഞാലിക്കുട്ടി

തിരുവനന്തപുരം: അഴിമതിക്കും കെടുകാര്യസ്ഥതയ്ക്കുമെതിരെ ജനം പ്രതികരിച്ചു തുടങ്ങിയതാണ് കർണ്ണാടകയിൽ കണ്ടതെന്നും കേരളത്തിലും അത് സംഭവിക്കുമെന്നും പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി. ​ യു.ഡി.എഫ് സംഘടിപ്പിച്ച സെക്രട്ടേറിയറ്റ് വളയൽ സമരത്തിൽ സംസാരിക്കുകയായിരുന്നു അദ്ദേഹം. ധൂർത്ത്, അഴിമതി, ഭരണ വൈകല്യം, പിടിപ്പുകേട് തുടങ്ങിയവയാണ് സർക്കാരിന്റെ മുഖമുദ്ര. ഇവിടെ അഴിമതി നടക്കുന്നെന്ന് പ്രതിപക്ഷം പറഞ്ഞാൽ ഇല്ലെന്ന് തെളിയിക്കാനുള്ള ബാദ്ധ്യത സർക്കാരുണ്ട്. എന്നാൽ, സർക്കാർ മിണ്ടുന്നില്ല.

പിണറായി സർക്കാർ

മരിച്ചു: ഷിബു ബേബിജോൺ

ജനങ്ങളുടെ ഹൃദയത്തിൽ പിണറായി സർക്കാർ മരിച്ചുവെന്ന് ചടങ്ങിൽ സംസാരിച്ച ആർ.എസ്.പി സംസ്ഥാനസെക്രട്ടറി ഷിബു ബേബിജോൺ പറഞ്ഞു. അന്ത്യകർമ്മങ്ങൾ നടത്താനായി 3 വർഷത്തേക്ക് സർക്കാരിനെ ജനം ഫ്രീസറിൽ വച്ചിരിക്കുകയാണ്. സമസ്‌ത ജനവിഭാഗവും സർക്കാരിന്റെ പ്രവർത്തനങ്ങളിൽ രോഷാകുലരാണ്. സംതൃപ്‌തിയുളളത് പിണറായിയുടെയും പാർട്ടിക്കാരുടെയും കുടുംബക്കാർക്ക് മാത്രമാണ്. കെ-ദുരന്ത ഭരണം കാഴ്‌ചവയ്‌ക്കുന്ന കെ-കമ്മിഷൻ സർക്കാരാണിതെന്നും ഷിബു പരിഹസിച്ചു.