ഒട്ടാവ: ഡെൽറ്റയേക്കാൾ വിനാശകാരിയായ ലാംബ്ഡ വകഭേദം കാനഡയിൽ വ്യാപിക്കുന്നു. വ്യാഴാഴ്ച 11 ലാംബ്ഡ കേസുകൾ രാജ്യത്ത് റിപ്പോർട്ട് ചെയ്തു. ലാംബ്ഡ എങ്ങനെയാണ് പടരുന്നതെന്നും വാക്സിനോട് എങ്ങനെയാണ് പ്രതികരിക്കുന്നതെന്നും കാനഡയിലെ ആരോഗ്യ വിദഗ്ദ്ധർ സൂക്ഷ്മമായി നിരീക്ഷിക്കുകയാണ്. ഇപ്പോൾ വളരെ കുറച്ച് കേസുകൾ മാത്രമാണ് റിപ്പോർട്ട് ചെയ്യപ്പെട്ടിട്ടുള്ളതെന്നും കൂടുതൽ വിവരങ്ങൾ ശേഖരിക്കുകയാണെന്നും ചീഫ് പബ്ലിക് ഹെൽത്ത് ഓഫിസറായ ഡോ. തെരേസ ടാം പറഞ്ഞു.
ലാംബ്ഡ എം ആർ.എൻ.എ വാക്സിനുകളായ ഫൈസർ, മൊഡേണ എന്നിവ സ്വീകരിച്ചവരിലും രോഗലക്ഷണങ്ങൾ ഉണ്ടാക്കുന്നതായി ന്യൂയോർക്ക് സർവകലാശാല പ്രസിദ്ധീകരിച്ച പഠനത്തിൽ പറയുന്നു. അതേസമയം, ഇവക്കെതിരെ ഫൈസറും മൊഡേണയും ഫലപ്രദമാണെന്നും പഠനത്തിൽ പറയുന്നു.
ഇതിനോടകം30ലധികം രാജ്യങ്ങളിൽ ലാംബ്ഡ റിപ്പോർട്ട് ചെയ്തിട്ടുണ്ട്. പെറുവിലാണ് ലാംബ്ഡ ആദ്യമായി റിപ്പോർട്ട് ചെയ്തത്. ബ്രിട്ടനിൽ ഇതുവരെ ആറ് ലാംബ്ഡ കേസുകൾ റിപ്പോർട്ട് ചെയ്തിട്ടുണ്ട്.
@ മൂന്നാം ഡോസിന് അനുമതി തേടി ഫൈസർ
രണ്ട് ഡോസ് വാക്സിനെടുത്തവർക്ക് മൂന്നാമതൊരു ഡോസു കൂടി നൽകാൻ യു.എസ് ഫുഡ് ആൻഡ് ഡ്രഗ് അഡ്മിനിസ്ട്രേഷന്റെ അനുമതി തേടാനൊരുങ്ങി ഫൈസർ. പുതിയ വകഭേദങ്ങൾക്കെതിരെയടക്കം അഞ്ചു മുതൽ പത്തു മടങ്ങു വരെ അധിക പ്രതിരോധം ഇതിലുടെ ലഭിക്കുമെന്നാണ് കമ്പനിയുടെ ഭാഷ്യം.
രണ്ടാം ഡോസെടുത്ത് 12 മാസത്തിനകം മൂന്നാം ഡോസെടുത്താൽ രണ്ട് ഡോസെടുത്തവരെക്കാൾ പതിൻമടങ്ങ് പ്രതിരോധ ശേഷി വർദ്ധിക്കുമെന്നും ഫൈസർ പറയുന്നു.
അമേരിക്കയിൽ 48 ശതമാനം പേർക്ക് മാത്രമാണ് ഇതുവരെ രണ്ട് ഡോസ് ലഭിച്ചിട്ടുള്ളത്. ജനസംഖ്യയുടെ പകുതിയിലധികം ആളുകൾക്കും രണ്ട് ഡോസ് പോലും ലഭിച്ചിട്ടില്ല അതുകൊണ്ട് തന്നെ,മൂന്നാം ഡോസിനുള്ള അനുമതി തേടുന്നത് ഫൈസർ ആഗസ്റ്റു വരെ വൈകിപ്പിച്ചേക്കും.
അമേരിക്കയിൽ ചിലയിടങ്ങളിൽ ഡെൽറ്റ വ്യാപിക്കുന്നുണ്ട്. ഡെൽറ്റയ്ക്കെതിരെ ഉയർന്ന പ്രതിരോധ ശേഷി നൽകാൻ മൂന്നാം ഡോസിന് കഴിയുമെന്നും ഫൈസർ വ്യക്തമാക്കി.വാക്സിനേഷനിലൂടെ ലഭിക്കുന്ന ആന്റിബോഡികൾ കാലക്രമേണ കുറഞ്ഞുവരുമെന്നും ബൂസ്റ്റർ ഡോസുകൾ ആവശ്യമാണെന്നും പഠനങ്ങളിൽ ചൂണ്ടിക്കാട്ടിയിരുന്നു.
ചില മേഖലകളിൽ കൊവിഡ് വ്യാപിക്കുമ്പോഴും മരണനിരക്ക് കുറയ്ക്കാനാകുന്നത് മുതിർന്ന പൗരന്മാർക്കടക്കം വാക്സിൻ നൽകിയത് കൊണ്ടാണ്.
യു.എസ് ആരോഗ്യ വിദഗ്ദ്ധൻ ഡോ. ആന്റണി ഫൗച്ചി
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |