റോഡ് നവീകരണത്തിനും പാലത്തിനും 81 കോടി രൂപയുടെ പദ്ധതി

തിരുവനന്തപുരം: നബാർഡ് സഹായത്തോടെ സംസ്ഥാനത്തെ ആറുറോഡുകൾ ആധുനിക നിലവാരത്തിൽ നവീകരിക്കുന്നതിനും പുതിയ ഒരു പാലത്തിനുമായി പൊതുമരാമത്ത് വകുപ്പ് 81.05 കോടി രൂപ അനുവദിച്ചതായി മന്ത്രി പി.എ.മുഹമ്മദ് റിയാസ് അറിയിച്ചു.കോട്ടുകാൽ -പൊതിയാറുവിള (ചടയമംഗലം-16 കോടി ), കറുകപുത്തൂർ-അക്കിക്കാവ് (തൃത്താല-13.5 കോടി), മുപ്പത്തടം-ആറാട്ടുകടവ്-പാനായിക്കുളം (കളമശ്ശേരി-6.58 കോടി), മാക്കുനി-പൊന്നിയംപാലം ബൈപ്പാസും അനുബന്ധ റോഡുകളും (തലശ്ശേരി-അഞ്ച് കോടി), കട്ടച്ചക്കോണം-കരിയം, കാര്യവട്ടം-ചേങ്കോട്ടുകോണം (കഴക്കൂട്ടം-7.08 കോടി), കൊണ്ടഴി- മായന്നൂർ (ചേലക്കര-12.49 കോടി) എന്നീ റോഡുകൾക്കും ബേപ്പൂരിലെ തൊണ്ടിലക്കടവ് പാലത്തിനുമാണ് (20.4 കോടി) തുക അനുവദിച്ചത്. നബാർഡിന്റെ റൂറൽ ഇൻഫ്രാസ്‌ട്രെക്ചർ ഡെവലപ്‌മെന്റ് ഫണ്ടിന്റെ (ആർ.ഐ.ഡി.എഫ്) സഹായത്തോടെയാണ് നിർമ്മാണം. പദ്ധതികൾ സമയബന്ധിതമായി പൂർത്തിയാക്കാൻ ഇടപെടുമെന്ന് മന്ത്രി പറഞ്ഞു.