തെളിയുന്നു,​ അനാഥന്റെ പൊള്ളുന്ന ജീവിതവും

കൊച്ചി: റെയിൽവേ സ്റ്റേഷനിൽ കണ്ടെത്തിയ ബാലൻ. മാനസിക പ്രശ്നമുണ്ട്. കേൾവിയും സംസാരശേഷിയുമില്ല. ചൈൽഡ് വെൽഫെയർ കമ്മിറ്റി ഏറ്റെടുത്ത് ചികിത്സിച്ചു. സുശ്യാം എന്നു പേരിട്ടു. ബധിര വിദ്യാലയത്തിൽ ചേർത്തു.

ഇന്നലെ,​ സംസ്ഥാന ഭിന്നശേഷി കലോത്സവത്തിൽ അവൻ നേടിയത് ചിത്രരചനയിൽ എ ഗ്രേഡും പെൻസിൽ ഡ്രോയിംഗിൽ ബി ഗ്രേഡും.

എറണാകുളം സൗത്ത് റെയിൽവേ സ്റ്റേഷനിൽ അലഞ്ഞുതിരിഞ്ഞ ബാലനെ എട്ടുമാസം മുമ്പാണ് ചൈൽഡ് വെൽഫെയർ കമ്മിറ്റി ഏറ്റെടുത്തത്. കോതമംഗലം പീസ് വാലിയിലെ മാനസികാരോഗ്യ കേന്ദ്രത്തിൽ ഏറെനാൾ ചികിത്സ. ശേഷം ഭിന്നശേഷി കുട്ടികൾക്കുള്ള ചിൽഡ്രൻസ് വില്ലേജിലെത്തിച്ചു. തെറാപ്പിസ്റ്റുകൾ പരിശീലനം നൽകി. കോതമംഗലം നെല്ലിക്കുഴിയിലെ ബധിര വിദ്യാലയത്തിൽ അഞ്ചാം ക്ലാസുകാരനായി. നന്നായി ചിത്രം വരുയ്ക്കുന്നതുകണ്ടാണ് കലോത്സവത്തിൽ പങ്കെടുപ്പിച്ചത്.

മാതാപിതാക്കളെക്കുറിച്ചോ സ്വന്തം നാടിനെക്കുറിച്ചോ ഒന്നും സുശ്യാമിന് അറിയില്ല. ചിത്രംവരച്ചും ആംഗ്യംകാട്ടിയും കുടുംബത്തെക്കുറിച്ച് ചോദിക്കാറുണ്ടെങ്കിലും മറുപടിയില്ല. മലയാളിയല്ലെന്നാണ് നിഗമനം. എങ്ങനെയും രക്ഷിതാക്കളെ കണ്ടെത്തണം. എങ്ങനെ കുട്ടി റെയിൽവേ സ്റ്റേഷനിൽ എത്തപ്പെട്ടെന്നറിയണം. അവനെ തിരികെ ഏല്പിക്കണം. സുശ്യാമിന്റെ വിജയവാർത്ത വഴിത്തിരിവാകുമോ?​ പ്രതീക്ഷയിലും പ്രാർത്ഥനയിലുമാണ് പീസ് വാലി മാനേജിംഗ് ഡയറക്ടർ സാബിത്ത് ഉമർ.