കൊവിഡിൽ സർക്കാർ കാഴ്‌ചക്കാർ: ചെന്നിത്തല

തിരുവനന്തപുരം: കൊവിഡ് വ്യാപനത്തിൽ സർക്കാർ കാഴ്‌ചക്കാരായെന്ന് മുൻ പ്രതിപക്ഷ നേതാവ് രമേശ് ചെന്നിത്തല ആരോപിച്ചു. സർക്കാർ ഇപ്പോഴും ആലോചനയിലാണ്. തന്റെ കഴിവില്ലായ്‌മ ആരോഗ്യ മന്ത്രി തെളിയിച്ചുകഴിഞ്ഞു. ടെലിവിഷനിൽ വാചക കസർത്തു നടത്തുന്ന മുഖ്യമന്ത്രിയെയും ഇത്തവണ കാണാനില്ല. സർക്കാർ ജനങ്ങളെ പൂർണമായും കൈവിട്ടു. സി.പി.എം സമ്മേളനങ്ങൾ നടക്കുന്നതിനാലാണ് മൂന്നാം തരംഗത്തിന്റെ തുടക്കം കണ്ടിട്ടും സർക്കാർ നിയന്ത്രണങ്ങളിലേക്ക് കടക്കാതിരുന്നത്. മൂന്നാം തരംഗമുണ്ടായിട്ടും സ്‌കൂളുകളും കോളേജുകളും അടയ്‌ക്കാത്തതിന് കേരളം വലിയ വിലയാണ് നൽകേണ്ടി വന്നിരിക്കുന്നത്. സർക്കാർ ഇനിയെങ്കിലും ഉണർന്ന് പ്രവർത്തിക്കണമെന്ന് ചെന്നിത്തല ആവശ്യപ്പെട്ടു.