റവന്യൂ ജില്ലാ സ്‌കൂൾ കായികമേള : മാറ്റിവച്ച മത്സരങ്ങൾ ഇന്നും നാളെയും മുഹമ്മയിൽ

ആലപ്പുഴ: പ്രതികൂല കാലാവസ്ഥയെ തുടർന്ന് മാറ്റിവച്ച റവന്യൂ ജില്ലാ സ്‌കൂൾ കായികമേളയുടെ പ്രധാന മത്സരങ്ങൾ ഇന്നും നാളെയും മുഹമ്മയിൽ നടക്കും. ഇന്ന് രാവിലെ 7.30ന് പ്രധാന വേദിയായ മുഹമ്മ മദർ തെരേസ സ്കൂളിൽ നസ്രത്ത് കാർമൽ ഗ്രൗണ്ടിലും ആര്യക്കര എ.ബി വിലാസം എച്ച്.എസ്.എസ് ഗ്രൗണ്ടിലും മത്സരങ്ങൾ ആരംഭിക്കും. രാവിലെ 9ന് മുഹമ്മ മദർതെരേസ സ്കൂളിൽ ജില്ലാ പഞ്ചായത്ത് വൈസ് പ്രസിഡന്റ് എൻ.എസ്.ശിവപ്രസാദ് മേള ഉദ്ഘാടനം ചെയ്യും. മുഹമ്മ പഞ്ചായത്ത് പ്രസിഡന്റ് സ്വപ്ന ഷാബു അദ്ധ്യക്ഷത വഹിക്കും.സ്‌പോർട്‌സ് കൗൺസിൽ ജില്ലാ വൈസ് പ്രസിഡന്റ് വി.ജി.വിഷ്ണു കായിക സന്ദേശം നൽകും. ബ്ളോക്ക് പഞ്ചായത്ത് അംഗം സിന്ധു രാജീവ് മുഖ്യാതിഥിയാകും. സ്കൂൾ മാനേജർ ഫാ. പോൾ തുണ്ടുപറമ്പിൽ മുഖ്യപ്രഭാഷണം നടത്തും. 52 ഇനങ്ങളിലാണ് ഇന്ന് മത്സരം. നാളെ 58 ഇനങ്ങളുണ്ടാകും. നാളെ വൈകിട്ട് 4.30ന് സമാപന സമ്മേളനം ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി ഉദ്ഘാടനം ചെയ്യും. മുഹമ്മ പഞ്ചായത്ത് വൈസ് പ്രസിഡന്റ് എൻ.ടി.റെജി അദ്ധ്യക്ഷത വഹിക്കും. സ്‌പോർട്‌സ് കൗൺസിൽ സെക്രട്ടറി എൻ.പ്രദീപ്കുമാർ മുഖ്യതിഥിയാകും. ജില്ലാ പഞ്ചായത്ത് അംഗം വി.ഉത്തമൻ മുഖ്യപ്രഭാഷണം നടത്തും.