വൈപ്പിൻ: ഇന്ത്യ ബുക്ക് ഒഫ് റെക്കാഡിൽ ഇടം പിടിച്ച രണ്ടര വയസുകാരി അനെയ്ക മിഥുൻ ചെറായിക്ക് അഭിമാനമാകുന്നു. ചെറായി പാലിപ്പാടത്ത് കുടുംബാംഗം ശരണ്യയുടെയും ഇടുക്കി ബൈസൻവാലിയിലെ പ്ലാന്തോട്ടത്തിൽ കുടുംബാംഗമായ മിഥുന്റെയും ഏക മകളാണ് ഈ മിടുക്കി.
ഒരു വയസ് തികയുംമുമ്പ് ചിത്രങ്ങൾ ശ്രദ്ധിക്കാനും അതിനെ കുറിച്ച് കൂടുതൽ അറിയാനും ഈ കുരുന്ന് താത്പര്യം കാട്ടി. മകളുടെ ഈ കഴിവ് പരിപോഷിപ്പിക്കാൻ ശരണ്യ ഒപ്പം കൂടിയതോടെ അനെയ്ക ഇന്ത്യ ബുക്ക് ഒഫ് റെക്കാഡിലേക്ക് ഓടിക്കയറി. മാസങ്ങളും അക്കങ്ങളും ഇംഗ്ലീഷ് അക്ഷരമാലയും കേരളത്തിലെ ജില്ലകളുടെ പേരും മഴവില്ലിലെ നിറങ്ങളുമൊക്കെ ഹൃദിസ്ഥമാക്കിയും അവ അനായസം ഉരുവിട്ടുമാണ് ഈ കുരുന്ന് വിധികർത്താക്കളുടെ മനം കവർന്നത്. സംസ്ഥാനത്തെ മന്ത്രിമാരും വകുപ്പുകളുമൊക്കെ ഈ കുഞ്ഞു പച്ചവെള്ളം പോലെ പറഞ്ഞുതരും. ഹോട്ടൽ രംഗത്ത് പ്രവർത്തിക്കുന്ന മിഥുനും കുടുംബവും ചെറായിലാണ് താമസം.