പേരാവൂർ: കോളയാട് ഗ്രാമ പഞ്ചായത്ത് കുടുംബശ്രീ സി.ഡി.എസിന്റെയും ബീ മാംഗോസിന്റെയും
സംയുക്താഭിമുഖ്യത്തിൽ കോളയാട് ഗ്രാമ പഞ്ചായത്ത് ഓഫീസിന് സമീപം ദ്വിദിന മാമ്പഴ മഹോത്സവം തുടങ്ങി. നാൽപതിനം മാമ്പഴങ്ങളുടെ പ്രദർശനവും വില്പനയുമാണ് നടക്കുന്നത്. കോളയാട് ഗ്രാമ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ടി. ജയരാജന്റെ അദ്ധ്യക്ഷതയിൽ ഗ്രാമപഞ്ചായത്ത് വൈസ് പ്രസിഡന്റ് കെ.ഇ. സുധീഷ് കുമാർ ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി അംഗങ്ങളായ ശ്രീജ പ്രദീപൻ, ഉമ ദേവി, വാർഡ് മെമ്പർ കെ.വി. ജോസഫ്, ഷീബ, സി.ഡി.എസ് ചെയർപേഴ്സൺ ശുകുന്തള, എൻ. ഷിജോ, റഫീക്ക്, കെ. യദുൽ, പി. ഷാജി തുടങ്ങിയവർ സംസാരിച്ചു. കർഷകരുടെ പക്കൽ നിന്നും നേരിട്ട് ശേഖരിക്കുന്ന മാങ്ങ യാതൊരു കൃത്രിമത്വവുമില്ലാതെ വൈക്കോലിൽ വച്ച് പഴുപ്പിച്ചാണ് വില്പനയ്ക്ക് എത്തിച്ചിരിക്കുന്നത്. മാമ്പഴ മഹോത്സവം ഇന്ന് സമാപിക്കും.