കണ്ണൂർ: വിഷു തിരക്കിനിടെ കണ്ണൂർ നഗരത്തിലുണ്ടായ തീപിടിത്തം പരിഭ്രാന്തി പരത്തി. കണ്ണൂർ പഴയ ബസ് സ്റ്റാൻഡ് പ്രസ് ക്ളബ്ബ് റോഡിലെ ചെരുപ്പ് കടയ്ക്കാണ് തീപിടിച്ചത്. ഇന്നലെ ഉച്ചയ്ക്ക് ഒന്നര മണിയോടെയാണ് സംഭവം. പരിസരത്തുള്ളവരുടെ സന്ദർഭോചിതമായ ഇടപെടലിനെ തുടർന്ന് തീപടരുന്നത് തടയാനായി.

ചെരിപ്പുകടയിലെ ജനറേറ്റർ കത്തിയതിനെത്തുടർന്നാണ് അപകടം. ഷോർട്ട് സർക്യൂട്ട് മൂലമാണ് ജനറേറ്ററിന് തീപിടിച്ചതെന്ന് കരുതുന്നു. പുക ഉയരാൻ തുടങ്ങിയ ജനറേറ്റർ ഉടൻ തൊഴിലാളികൾ പുറത്തെത്തിച്ചു.എന്നാൽ ചെരുപ്പുകൾ ചിലത് കത്തിനശിച്ചിരുന്നു. കടയിൽ നിന്നും തീയും പുകയും ഉയരുന്നത് കണ്ട് റോഡിലുണ്ടായിരുന്നവരും മറ്റു കടകളിലും സാധനങ്ങൾ വാങ്ങാനെത്തിയവർ ചിതറി ഓടി.പരിസരത്തെ കടയിലുള്ളവരും നാട്ടുകാരുമെത്തി തീയണക്കാൻ ശ്രമിച്ചു. ബർണശേരിയിൽ നിന്നും ഫയർഫോഴ്സിന്റെ രണ്ടു യൂണിറ്റുകളെത്തിയാണ് തീ കെടുത്തിയത്. ജനറേറ്റർ പുറത്തെത്തിക്കുന്നതിനിടെയിൽ കടയുടമക്ക് കൈക്ക് പൊള്ളലേറ്റു. ഇദ്ദേഹം ചികിത്സ തേടി.