കടയിൽ മോഷണം പ്രതി പിടിയിൽ

കൊല്ലം: കടയുടെ പൂട്ട് പൊളിച്ച് മോഷണം നടത്തിയ പ്രതി പിടിയിൽ. പരവൂർ നെടുങ്ങോലം
കടുവ പൊയ്ക വീട്ടിൽ വിജയ കൃഷ്ണനാണ് (25) പരവൂർ പൊലീസിന്റെ പിടിയിലായത്. കഴിഞ്ഞ ബുധനാഴ്ച രാത്രിയാണ് സംഭവം. പരവൂർ ഒല്ലാലിൽ പ്രവർത്തിക്കുന്ന സ്റ്രേഷനറി കടയിലാണ് മോഷണം നടത്തിയത്.

കടയുടെ ഷട്ടറിന്റെ ലോക്ക് തകർത്ത് ഉള്ളിൽ കടന്ന പ്രതി 12,500 രൂപയുടെ സാധനങ്ങളും
മേശയിൽ സൂക്ഷിച്ചിരുന്ന 4,500 രൂപയും മോഷ്ടിച്ചെടുക്കുകയായിരുന്നു. പരാതിയിൽ കേസ് രജിസ്റ്റർ ചെയ്ത് അന്വേഷണം ആരംഭിച്ച പൊലീസ് പ്രതിയെ കണ്ടെത്തി അറസ്റ്റ് ചെയ്യുകയായിരുന്നു.
പരവൂർ ഇൻസ്‌പെക്ടർ പ്രവീണിന്റെ നേതൃത്വത്തിൽ എസ്.ഐ സജിലാൽ, എ.എസ്.ഐ എസ്.രമേശൻ, സി.പി.ഒമാരായ റലേഷ് ബാബു, ജയേഷ് എന്നിവരുൾപ്പെട്ട സംഘമാണ് പ്രതിയെ അറസ്റ്റ് ചെയ്തത്. റിമാൻഡ് ചെയ്തു.