കോട്ടയം: അഗതി മന്ദിരങ്ങൾ, വ്യദ്ധസദനങ്ങൾ എന്നിവിടങ്ങളിലെ അന്തേവാസികൾക്കുള്ള സാമൂഹ്യ സുരക്ഷാ പെൻഷൻ പുനഃസ്ഥാപിക്കണമെന്ന് കേരള കോൺഗ്രസ് (എം) ചെയർമാൻ ജോസ് കെ. മാണി സർക്കാരിനോട് ആവശ്യപ്പെട്ടു. സർക്കാർ സഹായം ലഭിക്കുന്ന സ്ഥാപനങ്ങളിൽ കഴിയുന്നവരുടെ സംരക്ഷണം സ്ഥാപനത്തിന്റെ ഉത്തരവാദിത്വമാണെന്ന വാദം ധനവകുപ്പ് പുന:പരിശോധിക്കണം. സർക്കാർ ഗ്രാൻ്റ് കിട്ടുന്ന സ്ഥാപനങ്ങൾ കുറവാണ്. 619 വ്യദ്ധസദനങ്ങളിലായി 17937 അന്തേവാസികൾ ഉണ്ട് . 285 വികലാംഗ മന്ദിരങ്ങളിൽ 9321 പേരും 17 യാചക മന്ദിരങ്ങളിൽ 960 പേരും താമസിക്കുന്നുണ്ട്. ഇവരെയൊക്കെ സർക്കാർ തീരുമാനം ബാധിക്കും. 2016ൽ സാമൂഹ്യ നീതി വകുപ്പ് പുറത്തിറക്കിയ ഉത്തരവാണ് സർക്കാർ ഭേദഗതി ചെയ്തിരിക്കുന്നത്.