തൃശൂർ: കാഴ്ചയെ കൊല്ലുന്ന നിശ്ശബ്ദ കൊലയാളിയായി ഗ്ലോക്കോമ മാറുന്നുവെന്ന് ആരോഗ്യ വിദഗ്ദ്ധർ. രോഗമുണ്ടെന്ന സൂചന പോലും ലഭിക്കാത്തതു കൊണ്ടാണ് ഈ രോഗത്തിനെ നിശ്ശബ്ദ കൊലയാളിയെന്ന് വിളിക്കുന്നത്. ഇന്ത്യയിൽ ഏതാണ്ട് 12 ദശലക്ഷം ഗ്‌ളോക്കോമ രോഗികൾ ഉള്ളതായി ലോകാരോഗ്യ സംഘടന പറയുന്നു. ഇതിൽ 1.2 ദശലക്ഷം ആളുകൾക്ക് അന്ധത ബാധിച്ചിട്ടുണ്ട്. ലോകത്തിൽ 78 ദശലക്ഷം ആളുകളുടെ കാഴ്ചയെ ബാധിക്കുന്ന നേത്രരോഗമാണിത്.

പ്രകാശം നിറഞ്ഞ ഈ ലോകം കാണാനായി കാഴ്ച സംരക്ഷിക്കൂ എന്നതാണ് ഈ വർഷത്തെ ഗ്‌ളോക്കോമ വാരസന്ദേശം. തുടക്കത്തിൽ തന്നെയുള്ള രോഗനിർണയവും ചികിത്സയും കൊണ്ട് അന്ധതയെ ഒരു പരിധി വരെ തടയാം.

ഗ്ലോക്കോമ വാരാചരണത്തിന്റെ ഭാഗമായി ഇന്ന് ജില്ലയിലെ 11 കേന്ദ്രങ്ങളിൽ രാവിലെ 9 മുതൽ 1 മണി വരെ സൗജന്യ ഗ്ലോക്കോമ നിർണയ ക്യാമ്പുകൾ നടത്തും. കേരള സൊസൈറ്റി ഒഫ് ഒഫ്താൽമിക് സർജൻസിന്റെയും തൃശൂർ അക്കാഡമി ഒഫ് ഓഫ്തൽമിക് സർജൻസിന്റെയും ആഭിമുഖ്യത്തിലാണ് പരിപാടി.

ക്യാമ്പ് നടത്തുന്ന സ്ഥലങ്ങൾ:

ഗവ . മെഡിക്കൽ കോളേജ് തൃശൂർ, ജൂബിലി മിഷൻ തൃശൂർ, അമല ഹോസ്പിറ്റൽ, ഐ വിഷൻ ഹോസ്പിറ്റൽ, ഐ കെയർ സെന്റർ ചെമ്പുക്കാവ്, തൃശൂർ, ശാന്തി ഹോസ്പിറ്റൽ കൊടകര, റാണി മേനോൻ ഐ ഹോസ്പിറ്റൽ തൃശൂർ, ദൃശ്യം ഐ കെയർ സെന്റർ, മലബാർ ഐ ഹോസ്പിറ്റൽ തൃശൂർ, അശ്വിനി ഹോസ്പിറ്റൽ, ആര്യ ഐ കെയർ ഹോസ്പിറ്റൽ.

ഗ്ലോക്കോമ

• കാരണം കണ്ണിലെ രക്തസമ്മർദ്ദവും ദ്രാവകം അടിഞ്ഞു കൂടുന്നതും.
• നഷ്ടപ്പെട്ട കാഴ്ച തിരിച്ചു കിട്ടില്ല.
• 60 കഴിഞ്ഞവരിലെ അന്ധതയ്ക്ക് പ്രധാന കാരണം.

പരിഹാരം

മുൻകൂട്ടി അറിഞ്ഞാൽ കാഴ്ച നഷ്ടപ്പെടുന്നത് നിയന്ത്രിക്കാം. വേണ്ടത് പതിവായ കണ്ണ് പരിശോധന. 40ന് മുകളിലുള്ളവർ മൂന്ന് വർഷത്തിലൊരിക്കലും 65ന് മുകളിലുള്ളവർ വർഷം തോറും കണ്ണ് പരിശോധിക്കണം. മരുന്നും ശസ്ത്രക്രിയയും ലഭ്യമാണ്.