ന്യൂഡൽഹി: നടപ്പ് സാമ്പത്തിക വർഷത്തിന്റ ഒന്നാം പാദത്തിൽ എസ്​.ബി.ഐയുടെ അറ്റാദായത്തിൽ 55 ശതമാനം വർദ്ധന. കഴിഞ്ഞ വർഷത്തിന്റെ ഒന്നാം പാദവുമായി താരതമ്യം ചെയ്യുമ്പോഴാണ്​ ലാഭത്തിൽ വർദ്ധനയുണ്ടായത്​. 6504 കോടിയാണ്​ ഒന്നാം പാദ ലാഭം. കഴിഞ്ഞ വർഷം ഇത്​ 4,189.34 കോടിയായിരുന്നു.

എസ്​.ബി.ഐയുടെ ഓപ്പറേറ്റിങ്​ പ്രൊഫിറ്റിൽ അഞ്ച്​ ശതമാനം വർദ്ധനയുണ്ടായിട്ടുണ്ട്​. 18,975 കോടിയാണ്​ എസ്​.ബി.ഐയുടെ ഓപ്പറേറ്റിങ്​ പ്രൊഫിറ്റ്​. കഴിഞ്ഞ വർഷം 18,061 കോടിയായിരുന്നു. പലിശയിൽ നിന്നുള്ള വരുമാനത്തിൽ 3.74 ശതമാനം വർദ്ധനയുണ്ടായി. ആകെ നിക്ഷേപത്തിൽ 8.82 ശതമാനമാണ്​ വർദ്ധന. ആഭ്യന്തര വായ്​പയിലും 5.64 ശതമാനം വർദ്ധനയുണ്ടായിട്ടുണ്ട്​. കിട്ടാകടത്തിന്റെ തോതിലും കുറവുണ്ടായിട്ടുണ്ട്​. എൻ.പി.എ 9,420 കോടിയിൽ നിന്ന്​ 5,029 കോടിയായാണ്​ കുറഞ്ഞത്​. മികച്ച ലാഭമുണ്ടാവുമെന്ന പ്രവചനങ്ങളുണ്ടായതോടെ ബി.എസ്​.ഇ.യിൽ എസ്​.ബി.ഐ ഓഹരികൾക്ക്​ അഞ്ച്​ ശതമാനം നേട്ടമുണ്ടായി.