ജീവനോടെയോ കൊന്നോ എത്തിക്കുന്നവർക്ക് പണം; കൊതുകിനെ പിടിക്കുന്നവർക്ക് പാരിതോഷികം പ്രഖ്യാപിച്ചതിന് പിന്നിൽ

രാത്രിയെന്നോ പകലെന്നോ വ്യത്യാസമില്ലാതെ എല്ലാവർക്കും ശല്യമാകുന്ന ജീവിയാണ് കൊതുക്. കൊതുകിനെ നിസ്സാരന്മാരായി കാണാൻ കഴിയില്ല. മാരകരോഗാണുക്കളെയാണ് ഇവ വഹിക്കുന്നത്. അതിനാൽ എപ്പോഴും അതിനെതിരെ പ്രതിരോധം ആവശ്യമാണ്. കൊതുകിനെ ജീവനോടെയോ കൊന്നോ പിടിച്ച് നൽകുന്നവർക്ക് പാരിതോഷികം ലഭിക്കുമെന്ന് പറഞ്ഞാൽ നിങ്ങൾ വിശ്വസിക്കുമോ? എന്നാൽ അത്തരം ഒരു സംഭവം ഫിലിപ്പിൻസിൽ ഉണ്ട്. ഫിലിപ്പിൻസിലെ ഒരു നഗരത്തിലാണ് കൊതുകിനെ പിടിച്ച് നൽകുന്ന പൗരന്മാർക്ക് പണം നൽകുന്നത്. ജനങ്ങളുടെ നല്ലതിന് വേണ്ടിയാണ് ഇത്തരം ഒരു പ്രവൃത്തി ചെയ്യുന്നതെന്നാണ് അധികൃതർ പറയുന്നത്.

സെൻട്രൽ മനിലയിലെ മണ്ഡലുവോംഗ് നഗരത്തിലെ ബരാഞ്ച് ഹിൽസ് ഗ്രാമത്തിലാണ് വിചിത്ര നിയമം. ഏകദേശം ഒരു ലക്ഷത്തിലധികം പേരാണ് ഇവിടെ താമസിക്കുന്നത്. ഓരോ അഞ്ച് കൊതുകുകൾക്കും ഒരു പെസോയാണ് നൽകുന്നത് അതായാത് ഇന്ത്യയിലെ ഒരു രൂപ 50 പെെസ. ജീവനോടെയുള്ള കൊതുകിനെ കൊണ്ടുപോയാൽ അവർ അൾട്രാവയലറ്റ് ലെെറ്റ് ഉപയോഗിച്ച് കൊല്ലുന്നു. ഈ പദ്ധതി ആരംഭിച്ചതിന് ശേഷം നിരവധി കൊതുക് വേട്ടക്കാർ ഗ്രാമത്തിൽ ഉണ്ടായെന്ന് അധികൃതർ പറയുന്നു. 45 കാരനായ മിഗുവൽ ഏകദേശം 45 കൊതുകിനെ പിടിച്ചുനൽകിയിട്ടുണ്ട്. ഈ പ്രതിഫലം തനിക്ക് കോഫി വാങ്ങാനുള്ള പണം നൽകുമെന്നാണ് അയാൾ പറയുന്നത്. ഇത്തരം ഒരു പ്രവൃത്തി തുടങ്ങിയിട്ട് ഒരു മാസത്തോളം ആയി.

കാരണം

ഈ പ്രവൃത്തി ഗ്രാമത്തിൽ തുടങ്ങാൻ കാരണം കൂടിവരുന്ന കൊതുകുജന്യ രോഗങ്ങൾ തന്നെയാണ്. ഫിലിപ്പിൻസിൽ ഡെങ്കിപ്പനി ബാധിക്കുന്നവരുടെ എണ്ണം വർദ്ധിച്ചുവരുന്നത് അധികൃതരിൽ ആശങ്കയ്ക്ക് കാരണമായി. അതിനെ പ്രതിരോധിക്കാൻ കൂടിയാണ് ഇത് ആരംഭിച്ചത്. ഈ വർഷം ഇതുവരെ 10 പേരാണ് കൊതുകുജന്യ രോഗങ്ങൾ ബാധിച്ച് മരിച്ചത്. അതിൽ കൂടുതലും കുട്ടികളാണെന്ന് അധികൃതർ വ്യക്തമാക്കുന്നു. 1,​769 പേർക്കാണ് ഗ്രാമത്തിൽ അസുഖം ബാധിച്ചത്. മാരകമായ അണുബാധ പല പ്രദേശത്തും കൂടിവരികയാണ്. ഫെബ്രുവരി ഒന്ന് വരെ ഫിലിപ്പിൻസിൽ 28,​234 ഡെങ്കിപ്പനി കേസുകൾ റിപ്പോർട്ട് ചെയ്തിട്ടുണ്ട്. കഴിഞ്ഞ വർഷത്തെ അപേക്ഷിച്ച് ഇത് 40 ശതമാനം കൂടുതലാണ്.

രോഗം തടയാനും കൊതുകിനെ നശിപ്പിക്കാനുമാണ് ഈ പദ്ധതി കൊണ്ടുവന്നതെന്ന് ഗ്രാമത്തലവൻ സെൻനാർ മാദ്ധ്യമങ്ങളോട് പറഞ്ഞു. കൊതുകിനെ പിടിച്ച് നൽകിയാൽ പണം ലഭിക്കുമെന്നുള്ളതിനാൽ ചിലർ വീട്ടിൽ കൊതുകിനെ വളർത്തി വിൽക്കുന്നുണ്ട്. ഡെങ്കിപ്പനി കേസുകളുടെ വർദ്ധന കുറയുമ്പോൾ പണം നൽകുന്നത് അവസാനിപ്പിക്കാനാണ് അധികൃതരുടെ തീരുമാനം. ഫിലിപ്പിൻസിലെ മറ്റൊരു ഗ്രാമത്തിൽ കൊതുകിന്റെ വർദ്ധന കുറയ്ക്കാൻ തവളകളെ വളർത്താൻ ആരംഭിച്ചു. ചുറ്റുപാടുകൾ വൃത്തിയായി സൂക്ഷിക്കാനും വെള്ളം തങ്ങിനിൽക്കാൻ അനുവദിക്കരുതെന്നും അധികൃതർ ജനങ്ങൾക്ക് നിർദേശം നൽകി.

എന്താണ് ഡെങ്കിപ്പനി

ഈഡിസ് കൊതുകുകൾ പരത്തുന്ന ഡെങ്കി വൈറസ് മൂലമുണ്ടാകുന്ന രോഗമാണ് ഡെങ്കിപ്പനി. കെട്ടിക്കിടക്കുന്ന വെള്ളത്തിലാണ് ഇത്തരം കൊതുകുകൾ മുട്ടയിട്ട് വളരുന്നത്. കൊതുകുവഴി മാത്രമേ ഡെങ്കിപ്പനി ഒരാളിൽ നിന്നും മറ്റൊരാളിലേക്ക് പകരുകയുള്ളൂ. ഈഡിസ് കൊതുകിന്റെ സഞ്ചാര ദൂരം ചെറുതാണ്.

അതിനാൽ വീടും സ്ഥാപനങ്ങളും പരിസരങ്ങളും കൊതുക് മുക്തമാക്കുന്നത് ഡെങ്കിപ്പനി തടയാൻ സഹായിക്കും. ശക്തമായ വയറുവേദന, നീണ്ടു നിൽക്കുന്ന ഛർദി, കഠിനമായ ക്ഷീണം, തൊലിപ്പുറത്തും മോണകളിലുമുള്ള ചുവന്ന പാടുകളോ രക്തസ്രാവമോ,​ സന്ധി വേദന എന്നിവയാണ് ഇതിന്റെ ലക്ഷണങ്ങൾ.