കൊൽക്കത്ത: കേന്ദ്ര അന്വേഷണ ഏജൻസികൾ രാഷ്ട്രീയ ശത്രുക്കളെ വേട്ടായാടുന്നതിന് പിന്നിൽ പ്രധാനമന്ത്രി നരേന്ദ്ര മോദി ആണെന്ന് വിശ്വസിക്കുന്നില്ലെന്ന് ത്രിണമൂൽ കോൺഗ്രസ് അദ്ധ്യക്ഷയും പശ്ചിമബംഗാൾ മുഖ്യമന്ത്രിയുമായ മമതാ ബാനർജി പറഞ്ഞു. കേന്ദ്ര അന്വേഷണ ഏജൻസികൾ അതിരുകടന്നുള്ള അന്വേഷണത്തിനെതിരെ പശ്ചമിബംഗാൾ നിയമസഭയിൽ ത്രിണമൂൽ അവതരിപ്പിച്ച പ്രമേയത്തിൽ നടന്ന ചർച്ചയിൽ സംസാരിക്കുകയായിരുന്നു അവർ. കേന്ദ്ര സർക്കാർ ഏകാധിപത്യപരമായി പെരുമാറുകയാണ്. കേന്ദ്ര ഏജൻസികൾക്കു പിന്നിൽ ചില പ്രത്യേക ബി.ജി.പി നേതാക്കളാണെന്നും അവർ പറഞ്ഞു.

നിയമസഭയിൽ അവതരിപ്പിച്ച പ്രമേയത്തെ 189 പേർ അനുകൂലിച്ചപ്പോൾ 69 പേർ എതിർത്തു. എന്നാൽ പ്രമേയം നിയമസഭാ ചട്ടങ്ങൾക്ക് വിരുദ്ധമാണെന്ന് പ്രതിപക്ഷ നേതാവ് സുവേന്ദു അധികാരി പറഞ്ഞു. അതേസമയം സംസ്ഥാനത്തെ കൽക്കരി കുംഭകോണവുമായി ബന്ധപ്പെട്ട് തന്റെ അനന്തരവനും പാർട്ടി എം.പിയുമായ അഭിഷേക് ബാനർജിയെ ഇ.ഡി ചോദ്യം ചെയ്യാനിരിക്കെയാണ് മമതയുടെ പരാമർശമെന്നതും ശ്രദ്ധേയമാണ്.