അപ്പോഴിതായിരുന്നോ ഗുട്ടൻസ്? പാലും മുട്ടയും ഏറ്റവും പിറകിൽ, സൂപ്പർമാർക്കറ്റുകളിൽ ഇങ്ങനെ ചെയ്യുന്നതിന് പിന്നിൽ

നിത്യജീവിതത്തിൽ നമ്മൾ കൂടുതലും ഉപയോഗിക്കുന്ന ചില സാധനങ്ങളാണ് പാലും മുട്ടയും ബ്രെഡുമൊക്കെ. ഇവ വാങ്ങാൻ സൂപ്പർമാർക്ക​റ്റുകളിലെത്തിയാൽ ആദ്യം തന്നെ കാണണമെന്നില്ല. എപ്പോഴും പാലും മുട്ടയുമൊക്കെ റാക്കുകളിൽ ഏറ്റവും പിറകിലായിരിക്കും ഉണ്ടാകുക. എന്തിനാണ് ഇത്തരത്തിൽ ചെയ്യുന്നതെന്ന് നിങ്ങൾ ഒരു തവണയെങ്കിലും ആലോചിച്ച് നോക്കിയിട്ടുണ്ടോ? അത്യാവശ്യ വസ്തുക്കൾ എന്തിനായിരിക്കും സൂപ്പർമാർക്ക​റ്റുകളിൽ ഏ​റ്റവും ഒടുവിൽ നിരത്തിയിരിക്കുന്നത്?

ഇത്തരത്തിൽ ചെയ്യുന്നതിന് പിന്നിൽ ഒരു മാർക്ക​റ്റിംഗ് തന്ത്രമുണ്ട്. ആധുനിക ജീവിതത്തിൽ സൂപ്പർമാർക്ക​റ്റുകൾക്ക് വലിയൊരു പങ്കുണ്ട്. ആദ്യകാലങ്ങളിൽ ഒരു വീട്ടിലേക്കാവശ്യമായ സാധനങ്ങൾ വാങ്ങാൻ പല കടകൾ കയറിയിറങ്ങി ബുദ്ധിമുട്ടണമായിരുന്നു. എന്നാൽ ഇപ്പോഴത്തെ സാഹചര്യം അങ്ങനെയല്ല. ഉപ്പ് തൊട്ട് കർപ്പൂരം വരെ എന്ന് പറയുന്നതുപോലെ എല്ലാ സാധനങ്ങളും സൂപ്പർമാർക്ക​റ്റുകളിൽ ലഭ്യമാണ്. പാൽ, മുട്ട, ബ്രെഡ് എന്നിവ ഏ​റ്റവും പിറകിൽ നിരത്തിയിരിക്കുന്നതിന് രണ്ട് കാരണങ്ങളുണ്ട്.

ആദ്യത്തേത് ഉൽപ്പന്നങ്ങളെ കേടുപാട് കൂടാതെ സൂക്ഷിക്കുന്നതിനാണ്. സൂപ്പർമാർക്ക​റ്റുകളുടെ ഏ​റ്റവും ഉൾഭാഗത്ത് ഈ സാധനങ്ങൾ വയ്ക്കുന്നതിലൂടെ ഇവ ഫ്രഷായി സൂക്ഷിക്കാൻ സഹായിക്കും. ഇവ പെട്ടെന്ന് കേടാകുന്ന സാധനങ്ങളാണ്. അതിനാൽത്തന്നെ താപനില കുറഞ്ഞ ഭാഗങ്ങളിലാണ് ഇവ സൂക്ഷിക്കേണ്ടത്. ദി സീക്രട്ട് ലൈഫ് ഒഫ് ഗ്രോസറി സ്‌​റ്റോഴ്സിന്റെ രചയിതാവായ ബെഞ്ചമിൻ ലോർ വിശദീകരിക്കുന്നത് ഇങ്ങനെ, സൂപ്പർമാർക്ക​റ്റുകളിലെ വായുസഞ്ചാരമാണ് മ​റ്റൊരു ഘടകം. ഉൽപ്പന്നങ്ങൾ കേടുകൂടാതെ സൂക്ഷിക്കാൻ വായു സഞ്ചാരം പ്രധാന ഘടകമാണ്. സാധാരണയായി എയർകണ്ടീഷണറുകൾ സൂപ്പർമാർക്ക​റ്റുകളിൽ ഘടിപ്പിക്കുമ്പോൾ കൂടുതൽ തണുത്ത വായു പിൻഭാഗത്തേക്കാണ് ചലിക്കുന്നത്. ഇത് ഉൽപ്പന്നങ്ങൾ കേടുകൂടാതെ സൂക്ഷിക്കാൻ സഹായിക്കും.

മ​റ്റൊരു ഘടകം എന്നത് സൂപ്പ‌ർമാർക്കറ്റുകളിലെ കച്ചവട തന്ത്രങ്ങളാണ്. ആവശ്യസാധനങ്ങൾ വാങ്ങാനെത്തുന്നവരിലേക്ക് കൂടുതൽ ഉൽപ്പന്നങ്ങളുടെ ശ്രദ്ധയെത്തിക്കുന്നതിനാണ് ഇത്തരത്തിൽ ചെയ്യുന്നത്. ഇതോടെ പാലും മുട്ടയും വാങ്ങാനെത്തുന്നവർ കൂടുതൽ സാധനങ്ങൾ വാങ്ങുന്നു, ഉപഭോക്താക്കളുടെ മാനസികശാസ്ത്രം കൂടി മനസിലാക്കിയതിനുശേഷമാണ് സൂപ്പർമാർക്കറ്റ് ജീവനക്കാർ ഇത്തരത്തിൽ ചെയ്യുന്നത്.