മുംബയ്: കുട്ടിക്രിക്കറ്റിൽ അസാദ്ധ്യമായി ഒന്നുമില്ലെന്ന് രാഹുൽ തെവാത്തിയ എന്ന ഹരിയാനക്കാരൻ ഒരിക്കൽക്കൂടി തെളിയിച്ച ഐ.പി.എൽ പോരാട്ടത്തിൽ ഗുജറാത്ത് ടൈറ്റൻസിന് കിംഗ്സ് ഇലവൻ പഞ്ചാബിനെതിരെ അവസാന പന്തിൽ നാടകീയ ജയം. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ കിംഗ്സ് ഇലവൻ പഞ്ചാബ് 20 ഓവറിൽ 9 വിക്കറ്റ് നഷ്ടത്തിൽ 189 റൺസെടുത്തു. മറുപടിക്കിറങ്ങിയ ഗുജറാത്ത് ശുഭ്മാൻ ഗില്ലിന്റെ വെടിക്കെട്ട് ബാറ്റിംഗിന്റെയും തുടർന്ന് രാഹുൽ തെവാത്തിയയുടെ അസാദ്ധ്യ ഫിനിഷിംഗിന്റെ പിൻബലത്തിൽ അവസാന പന്തിലെ സിക്സറിലൂടെ വിജയം സ്വന്തമാക്കുകയായിരുന്നു.
ഒഡേൻ സ്മിത്ത് എറിഞ്ഞ അവസാന ഓവറിൽ ഗുജറാത്തിന് ജയിക്കാൻ 19 റൺസായിരുന്നു വേണ്ടിയിരുന്നത്. ഡേവിഡ് മില്ലറും ക്യാപ്ടൻ ഹാർദ്ദിക് പാണ്ഡ്യയുമായിരുന്നു അപ്പോൾ ക്രീസിൽ. ആദ്യ പന്ത് വൈഡായതിന് അധികം കിട്ടിയ പന്തിൽ പാണ്ഡ്യ റണ്ണൗട്ടായി. പിന്നീടെത്തിയ തെവാത്തിയ രണ്ട് പന്തിൽ ജയിക്കാൻ 12 റൺസ് ആവശ്യമായിരിക്കെ അഞ്ചാം പന്ത് ഡീപ് മിഡ്വിക്കറ്റിലേക്കും അവസാന പന്ത് ലോംഗ് ഓണിന് മുകളിലൂടെയും സിക്സ് പറത്തി ഗുജറാത്തിന് ത്രസിപ്പിക്കുന്ന ജയം സമ്മാനിക്കുകയായിരുന്നു. നേരിട്ട മൂന്ന് പന്തിൽ നിന്ന് രണ്ട് സിക്സുൾപ്പെടെ 13 റൺസാണ് തെവാത്തിയ അടിച്ചെടുത്തത്. 2020 സീസണിൽ രാജസ്ഥാൻ റോയൽസിനായും പഞ്ചാബിനെതിരെ തെവാത്തിയ ഇതേപോലുള്ള അവിശ്വസനീയ പ്രകടനം പുറത്തെടുത്തിരുന്നു.
വമ്പൻ വിജയലക്ഷ്യം പിന്തുടർന്നിറങ്ങിയ ഗുജറാത്തിനായി ഓപ്പണർ ശുഭ്മാൻ ഗിൽ ഗംഭീര പ്രകടനമാണ് പുറത്തെടുത്തത്. 59 പന്തിൽ നിന്ന് 11 ഫോറും 1 സിക്സും ഉൾപ്പെടെ ഗിൽ 96 റൺസാണ് അടിച്ചുകൂട്ടിയത്. മറ്റൊരു ഓപ്പണർ മാത്യു വേഡ് (6) പുറത്തായ ശേഷം സായി സുദർശനൊപ്പം (35) ചേർന്ന് 68 പന്തിൽ ശുഭമാൻ ഗിൽ ഉണ്ടാക്കിയ 101 റൺസിന്റെ കൂട്ടുകെട്ടാണ് ഗുജറാത്ത് ഇന്നിംഗ്സിന്റെ നട്ടെല്ലായത്. ഹാർദ്ദിക് പാണ്ഡ്യ 18 പന്തിൽ 27 റൺസ് നേടി. മില്ലർ 6 റൺശുമായി തെവാത്തിയയോടൊപ്പം പുറത്താകാതെ നിന്നു. കഗീസോ റബാഡ പഞ്ചാബിനായി രണ്ട് വിക്കറ്റ് വീഴ്ത്തി.
നേരത്തേ 27 പന്തിൽ 7 ഫോറും 4 സിക്സും അടക്കം 64 റൺസ് നേടിയ ലിയാം ലിവിംഗ്സ്റ്റണാണ് പഞ്ചാബ് ഇന്നിംഗ്സിന്റെ പടനായകനായത്. 21 പന്തിൽ ലിവിംഗ്സ്റ്റൺ 50 തികച്ചു.
ശിഖർ ധവാൻ (35), ജിതേഷ് ശർമ്മ (11 പന്തിൽ 23), ഷാരൂഖ് ഖാൻ (8 പന്തിൽ 15) എന്നിവർ ലിവിംഗ്സ്റ്റണൊപ്പം നല്ല കൂട്ടുകെട്ടുണ്ടാക്കി പഞ്ചാബ് ഇന്നിംഗ്സിന് നിർണായക സംഭാവന നൽകി. അവസാന വിക്കറ്റിൽ രാഹുൽ ചഹറും (14 പന്തിൽ 22, 2 ഫോർ, 1 സിക്സ്), അർഷദീപും (5 പന്തിൽ 10) അപ്രതീക്ഷിതമായി റണ്ണുയർത്തിയതോടെയാണ് പഞ്ചാബ് 189 എന്ന മികച്ച ടോട്ടലിൽ എത്തിയത്. 13 പന്തിൽ നിന്ന് പത്താം വിക്കറ്റിൽ പുറത്താകാതെ ഇരുവരും 27 റൺസിന്റെ കൂട്ടുകെട്ടുണ്ടാക്കി. ഗുജറാത്തിനായി റാഷിദ് ഖാൻ മൂന്നും ദർഷൻ നൽകാണ്ടെ രണ്ടും വിക്കറ്റുകൾ വീഴ്ത്തി.
ഐ.പി.എല്ലിൽ ഇന്ന്
ബാംഗ്ലൂർ - മുംബയ്
( രാത്രി 7.30 മുതൽ)
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |