രഹാനെയ്ക്ക് പരിക്ക്, ഐ.പി.എൽ നഷ്ടമാകും

മുംബയ്: സൺറൈസേഴ്‌സ് ഹൈദരാബാദിനെതിരായ ഐ.പി.എൽ മത്സരത്തിനിടെ പേശിവലിവ് അനുഭവപ്പെട്ട കൊൽക്കത്ത നൈറ്റ് റൈഡേഴ്‌സിന്റെ പരിചയസമ്പന്നനായ ബാറ്റർ അജിങ്ക്യ രഹാനെയ്ക്ക് സീസണിലെ ഇനിയുള്ള മത്സരങ്ങളിൽ കളിക്കാനാവില്ല. രഹാനെ കൊൽക്കത്ത ക്യാമ്പ് വിട്ട് നാട്ടിലേക്ക് മടങ്ങി. ഈ സീസണിൽ വേണ്ടത്ര മികവ് പുറത്തെടുക്കാൻ രഹാനെയ്ക്ക് സാധിച്ചിരുന്നില്ല.ഏഴ് മത്സരങ്ങൾ കളിച്ച രഹാനെ 133 റൺസ് മാത്രമാണ് നേടിയത്. 44 റൺസാണ് ഉയർന്ന സ്‌കോർ. സൺറൈസേഴ്‌സിനെതിരായ മത്സരത്തിൽ 24 പന്തുകളിൽ നിന്ന് 28 റൺസെടുത്തിരുന്നു.

ഇത്തവണ മെഗാലേലത്തിൽ ഒരുകോടി രൂപയ്ക്കാണ് രഹാനയെ കൊൽക്കത്ത ടീമിലെടുത്തത്. 13 മത്സരങ്ങളിൽ നിന്ന് 12 പോയിന്റുള്ള കൊൽക്കത്ത പട്ടികയിൽ ആറാമതാണ്. ഇന്നത്തെ മത്സരത്തിൽ ലഖ്‌നൗ സൂപ്പർ ജയന്റ്‌സാണ് കൊൽക്കത്തയുടെ എതിരാളി.