ലോകം കണ്ട ഏറ്റവും വലിയ ചുഴലിക്കാറ്റ്! 'മെലിസ' ജമൈക്കയിലേക്ക്

ഇക്കൊല്ലം ലോകം കണ്ട ഏറ്റവും വലിയ ചുഴലിക്കാറ്റ് കരീബിയൻ ദ്വീപ് രാജ്യമായ ജമൈക്കയിലേക്ക് എത്തിക്കഴിഞ്ഞു.കാറ്റ​ഗറി അഞ്ചിൽ പെടുന്ന തീവ്രചുഴലിയാണ് മെലിസ. മണിക്കൂറിൽ 282 കിലോമീറ്റർ വേ​ഗം.മെലിസ ജമൈക്കയ്ക്ക് മേൽ വൻ ദുരന്തം സൃഷ്ടിക്കുമെന്നാണ് അധികൃതർ നൽകുന്ന മുന്നറിയിപ്പ്. വിനാശകരമായ കാറ്റിനും വെള്ളപ്പൊക്കത്തിനും കാരണമാകുമെന്നും കൂട്ടിച്ചേർത്തു.ജമൈക്കയിൽ തന്നെ ഇതുവരെ ഉണ്ടായിട്ടുള്ളതിൽ ഏറ്റവും ശക്തിയേറിയ ചുഴലിക്കാറ്റായി ഇതുമാറുമെന്നാണ് കാലാവസ്ഥാ വിദ​ഗ്ധർ പറയുന്നത്. പടിഞ്ഞാറൻ ആഫ്രിക്കയുടെ തീരത്ത് ഇടിമിന്നലുകളുടെ കൂട്ടമായാണ് മെലിസ ഉത്ഭവിച്ചത്.സഫിർ-സിംപ്സൺ ഹരികെയ്ൻ വിൻഡ് സ്കെയിൽ ഉപയോ​ഗിച്ചാണ് ചുഴലിക്കാറ്റുകളെ തരം തിരിക്കാറുള്ളത്. കാറ്റിന്റെ വേ​ഗതയുടെ അടിസ്ഥാനത്തിലാണ് തരംതിരിക്കൽ.അഞ്ച് വിഭാ​ഗങ്ങളായിട്ടാണ് ചുഴലിക്കാറ്റുകളെ തരംതിരിച്ചിട്ടുള്ളത്.ഇതിൽ ഏറ്റവും ശക്തിയേറിയതാണ് അഞ്ചാം കാറ്റ​ഗറി.മണിക്കൂറിൽ 252 കിലോമീറ്ററോ അതിൽ കൂടുതലോ വേ​ഗതയിൽ വീശുന്നവയാണ് ഈ വിഭാ​ഗത്തിലേത്.ഈ വർഷത്തെ അത്‍ലാന്റിക് ഹരികേൻ സീസണിലെ 13ാമത്തെ ചുഴലിയാണ് മെലിസ.ജൂൺ ഒന്നു മുതൽ നവംബർ 30 വരെ നീണ്ടുനിൽക്കുന്നതാണ് അത്‍ലാന്റിക് ചുഴലി സീസൺ.അത്‍ലാന്റിക് തടത്തിൽ ഓരോ വർഷവും 7 ചുഴലിക്കാറ്റുകളും 3 തീവ്ര ചുഴലിക്കാറ്റുകളും ഉണ്ടാകാറുണ്ട്. ഓ​ഗസ്റ്റിലെ എറിൻ, സെപ്തംബറിലെ ഹംബർട്ടോ എന്നീ ചുഴലികൾക്ക് ശേഷം ഇക്കൊല്ലത്തെ ചുഴലി സീസണിൽ വീശുന്ന മൂന്നാമത്തെ അഞ്ചാം കാറ്റ​ഗറി ചുഴലിയാണ് മെലിസ.20 വർഷങ്ങൾക്കിടെ ഇത് ആദ്യമായാണ് ഒറ്റസീസണിൽ ഇത്രയധികം വമ്പൻ ചുഴലികളുണ്ടാകുന്നത്.ക്യൂബൻ തീരത്തേക്ക് നീങ്ങുന്നതോടെ ചുഴലി ശക്തി ക്ഷയിച്ച് മൂന്നാം കാറ്റ​ഗറിയിലേക്ക് മാറുമെന്നാണ് പ്രവചനം.കാറ്റിന്റെയും മർദ്ദത്തിന്റെയും രീതി പരി​ഗണിച്ച് മെലിസ ഈ വർഷം ലോകത്ത് വീശിയടിച്ച ചുഴലികളിൽ ഏറ്റവും ശക്തിയേറിയത് ആകുമെന്നാണ് നാഷണൽ ഹരിക്കേൻ സെന്ററിന്റെ ഏറ്റവും പുതിയ ഡാറ്റ വ്യക്തമാക്കുന്നത്.