ശമനമില്ല; ശ്വാന ശല്യത്തിന് 

കണ്ണൂരിലെ മനോഹരമായ പയ്യാമ്പലം ബീച്ചിൽ നിന്ന് ഇറ്റാലിയൻ യുവതി ജെസിക്ക സെറീന അലക്സാണ്ടർ (26) ആഗ്രഹിച്ചത് ഇന്ത്യൻ ക്രിസ്മസിന്റെ ഊഷ്മളത അനുഭവിക്കാനായിരുന്നു. എന്നാൽ ക്രിസ്മസ് തലേന്ന് വൈകുന്നേരം 4.20-ന് അവർക്ക് നേരിടേണ്ടി വന്നത് നാലോളം വരുന്ന തെരുവ് നായകളുടെ ആക്രമണമായിരുന്നു. ബാംഗ്ളൂരിലെ ഇന്റേൺഷിപ്പിൽ നിന്ന് അവധിക്കാലം ആഘോഷിക്കാൻ എത്തിയ യുവതിയുടെ കാലിൽ ഗുരുതരമായി കടിച്ച് മുറിവേപ്പിച്ച നായയെ പിടികൂടാനായില്ല. പിങ്ക് പൊലീസിന്റെ സഹായത്തോടെ ജില്ലാ ആശുപത്രിയിലെത്തിയ ജെസിക്കയുടെ അനുഭവം കണ്ണൂരിലെ ദിനംപ്രതി നൂറുകണക്കിന് ആളുകൾ അഭിമുഖീകരിക്കുന്ന യാഥാർത്ഥ്യത്തിന്റെ ഒരു നേർക്കാഴ്ചയാണ്.

ഭയാനകമായ കണക്കുകൾ
കണ്ണൂർ ജില്ലയിലെ തെരുവ് നായ പ്രശ്‌നം ഇന്ന് നേരിടുന്നത് ഒരു പൊതുജനാരോഗ്യ പ്രതിസന്ധിയുടെ തലത്തിലാണ്. 2020 മുതൽ 2025 ഓഗസ്റ്റ് വരെയുള്ള ആറ് വർഷത്തിനിടെ മാത്രം 75,199 പേർക്ക് തെരുവ് നായകളുടെ കടിയേറ്റ് ചികിത്സ തേടേണ്ടി വന്നു എന്നത് ഞെട്ടിക്കുന്ന കണക്കാണ്. ഇത് പ്രതിദിനം ശരാശരി 34 പേര്‍ എന്ന കണക്കിൽ വരും. എന്നാൽ കൂടുതൽ ഗൗരവകരമായത് ഈ കണക്കുകളുടെ വർദ്ധനാ നിരക്കാണ്. 2020-ൽ 3,998 പേര്‍ മാത്രമായിരുന്നു ചികിത്സ തേടിയതെങ്കിൽ,​ 2021-ൽ ഈ സംഖ്യ നാലിരട്ടിയായി 15,299 ആയി കുതിച്ചുയർന്നു. 2022-ൽ 18,584 പേര്‍ എന്ന റെക്കോർഡ് ഉയരത്തിലെത്തിയ ശേഷം 2023-ൽ 15,760, 2024-ൽ 15,148 എന്നിങ്ങനെ ഉയർന്ന നിലയിൽ തുടരുന്നു. 2025-ൽ ഓഗസ്റ്റ് വരെ മാത്രം 12,171 പേർക്ക് കടിയേറ്റു എന്നത് വർഷാവസാനത്തോടെ കണക്ക് വീണ്ടും 15,000 കടക്കുമെന്ന് വ്യക്തമാക്കുന്നു.

വ്യാപകമായ പ്രശ്‌നം

സംസ്ഥാനത്തുടനീളം തെരുവ്നായ ആക്രമണങ്ങൾ വർദ്ധിക്കുന്നു എന്നത് വസ്തുതയാണ്. 2025-ൽ ഓഗസ്റ്റ് വരെയുള്ള കണക്കുകൾ പ്രകാരം തിരുവനന്തപുരത്ത് 40,413 പേർക്കാണ് ഏറ്റവും കൂടുതൽ കടിയേറ്റത്. തുടർന്ന് കൊല്ലം (31,015), പാലക്കാട് (24,065), ആലപ്പുഴ (23,969), എറണാകുളം (23,877) എന്നീ ജില്ലകളും ഗുരുതര സ്ഥിതിയിലാണ്. കണ്ണൂർ പട്ടികയിൽ ഒമ്പതാം സ്ഥാനത്താണെങ്കിലും, ജനസംഖ്യയുമായി താരതമ്യപ്പെടുത്തുമ്പോൾ ഇവിടെയുള്ള പ്രശ്‌നം കൂടുതൽ രൂക്ഷമാണെന്ന് വിദഗ്ദർ ചൂണ്ടിക്കാട്ടുന്നു.

ആരൊക്കെയാണ് ഇരകൾ?

തെരുവ് നായകളുടെ ആക്രമണത്തിന് വിധേയരാകുന്നവരിൽ പ്രധാനമായും രണ്ട് വിഭാഗങ്ങളുണ്ട് - കുട്ടികളും പ്രായമായവരും. സ്‌കൂളിലേക്കും തിരിച്ചും പോകുന്ന വിദ്യാർത്ഥികൾ, രാവിലെയും വൈകുന്നേരവും നടക്കാൻ പോകുന്ന മുതിർന്നവർ, വീട്ടുജോലികൾക്കായി പുറത്തിറങ്ങുന്ന സ്ത്രീകൾ എന്നിവർ പ്രധാന ഇരകളാണ്. അടുത്തിടെ അയ്യൻകുന്ന് പഞ്ചായത്തിലെ കച്ചേരിക്കടവിലും മുഴക്കുന്ന് പഞ്ചായത്തിലെ അയ്യപ്പൻക്കാവിലുമായി മൂന്ന് സ്ത്രീകൾ ഉൾപ്പെടെ അഞ്ച് പേർക്ക് പേപ്പട്ടിയുടെ കടിയേറ്റു എന്നത് പ്രശ്‌നത്തിന്റെ വ്യാപ്തി കാണിക്കുന്നു. വളർത്തു മൃഗങ്ങളും ആക്രമണത്തിനിരയാകുന്നുണ്ട്. പേപ്പട്ടി നായകൾ പ്രത്യേകിച്ചും ആക്രമണോത്സുകമാണെന്നും ഇവയെ നിയന്ത്രിക്കാൻ തദ്ദേശ സ്ഥാപനങ്ങൾ കാര്യമായ നടപടികളൊന്നും സ്വീകരിക്കുന്നില്ലെന്നുമാണ് പരാതി.

സ്ഫോടനാത്മകമായ വളർച്ച

2019-ലെ സെൻസസ് പ്രകാരം കണ്ണൂ‍ർ ജില്ലയിൽ 23,666 തെരുവ് നായകളുണ്ടായിരുന്നു. എന്നാൽ ആറ് വർഷത്തിനുള്ളിൽ ഈ എണ്ണം ഇരട്ടിയിലധികം വർദ്ധിച്ചിരിക്കാമെന്നാണ് വിദഗ്ദരുടെ കണക്കുകൂട്ടൽ. അതായത് ഇന്ന് ജില്ലയിൽ ഏകദേശം 50,000-ത്തോളം തെരുവ് നായകളുണ്ടാകാം. ഈ വർദ്ധനയ്ക്ക് പല കാരണങ്ങളുമുണ്ട്. നായകളുടെ പ്രജനനശേഷി വളരെ ഉയർന്നതാണ്. ഒരു പെൺ നായ വർഷത്തിൽ രണ്ട് തവണ പ്രസവിക്കുകയും ഓരോ പ്രസവത്തിലും നാല് മുതല്‍ ആറ് വരെ കുഞ്ഞുങ്ങൾ ഉണ്ടാകുകയും ചെയ്യുന്നു. ഇവയ്ക്ക് ആറ് മാസം പ്രായമാകുമ്പോഴേക്കും പ്രജനന ശേഷി കൈവരികയും ചെയ്യും.
മാലിന്യം ശരിയായി സംസ്‌കരിക്കാത്തതും നായകൾക്ക് എളുപ്പത്തിൽ ഭക്ഷണം ലഭ്യമാകുന്നതും ഇവയുടെ വർദ്ധനയ്ക്ക് കാരണമാകുന്നു. തുറസ്സായ സ്ഥലങ്ങളിൽ മാലിന്യം തള്ളുന്നതും ചില ആളുകൾ നായകൾക്ക് ഭക്ഷണം നൽകുന്നതും പ്രശ്‌നം രൂക്ഷമാക്കുന്നു.

വന്ധ്യംകരണം - കടലാസിൽ പരിഹാരം

തെരുവ് നായ നിയന്ത്രണത്തിന് ആനിമൽ ബർത്ത് കണ്‍ട്രോൾ പ്രോഗ്രാം (എബിസി) വഴി പടിയൂരിലെ കേന്ദ്രത്തിൽ നായ വന്ധ്യംകരണം നടത്തുന്നുണ്ട്. എന്നാൽ നിലവിലെ വന്ധ്യംകരണ നിരക്കും നായകളുടെ പ്രജനന നിരക്കും തമ്മിൽ വലിയ അന്തരമുണ്ട്.
പ്രതിമാസം നൂറുകണക്കിന് നായകൽ വന്ധ്യംകരിക്കപ്പെടുന്നുണ്ടെങ്കിലും, അതേ കാലയളവിൽ ആയിരക്കണക്കിന് പുതിയ കുഞ്ഞുങ്ങൾ ജനിക്കുന്നു. വന്ധ്യംകരണത്തിന് ശേഷം നായകളെ തിരിച്ച് അതേ സ്ഥലത്ത് വിടുന്ന നയവും പ്രശ്‌നമാണ്. ഇവ തന്നെ വീണ്ടും മനുഷ്യരെ ആക്രമിക്കുന്നുണ്ട്. കൂടാതെ, വന്ധ്യംകരണത്തിന് മുമ്പ് നായകളെ പിടിച്ചെടുക്കുന്നതും കൊണ്ടുപോകുന്നതും സംബന്ധിച്ച് പ്രായോഗിക ബുദ്ധിമുട്ടുകൾ നേരിടുന്നുണ്ട്. പ്രത്യേകിച്ച് ആക്രമണോത്സുകരായ പേപ്പട്ടി നായകളെ പിടികൂടാൻ പരിശീലനം ലഭിച്ച ആളുകളുടെ കുറവുമുണ്ട്. ജില്ലാ പഞ്ചായത്ത് താത്ക്കാലിക ഷെൽറ്ററുകൾ സ്ഥാപിക്കാൻ നിർദ്ദേശം നൽകിയിട്ടുണ്ടെങ്കിലും, ഒരിടത്തും തന്നെ ഇത് യാഥാർത്ഥ്യമായിട്ടില്ല. മതിയായ സ്ഥലം കണ്ടെത്താൻ കഴിയാത്തതാണ് പ്രധാന പ്രതിസന്ധിയെന്ന് തദ്ദേശസ്ഥാപന പ്രതിനിധികൾ പറയുന്നു. എന്നാൽ വാസ്തവത്തിൽ നിലവിലുള്ള സ്ഥലങ്ങൾ തിരിച്ചറിഞ്ഞിട്ടും അവിടെ ഷെൽറ്റർ സ്ഥാപിക്കുന്നതിന് പ്രാദേശിക ജനങ്ങളുടെ എതിർപ്പുണ്ട്. നായകളുടെ ശബ്ദം, ദുർഗന്ധം, രോഗവ്യാപനം എന്നിവയെ കുറിച്ചുള്ള ഭയമാണ് എതിർപ്പിന്റെ പ്രധാന കാരണം. വളരെ വിദൂര പ്രദേശങ്ങളിൽ ഷെൽറ്റർ സ്ഥാപിക്കാനുള്ള ശ്രമങ്ങളും സാമ്പത്തിക ബുദ്ധിമുട്ടുകൾ കാരണം പരാജയപ്പെടുന്നു.

വാഗ്ദാനങ്ങളും നിരാശയും

കഴിഞ്ഞ തദ്ദേശ തെരഞ്ഞെടുപ്പിൽ വോട്ടർമാർ സ്ഥാനാർത്ഥികളോട് ഉന്നയിച്ച പ്രധാന ആവശ്യങ്ങളിൽ ഒന്നായിരുന്നു തെരുവ് നായ ശല്യം പരിഹരിക്കണം എന്നത്. നഗരത്തിൽ ഒരു ദിവസം തന്നെ നിരവധി പേർക്ക് തുടർച്ചയായി കടിയേറ്റ സാഹചര്യമുണ്ടായപ്പോൾ കഠിനമായ നടപടികളുമായി കോർപ്പറേഷനും പഞ്ചായത്തുകളും രംഗത്തെത്തിയിരുന്നു. എന്നാൽ തെരഞ്ഞെടുപ്പ് ചൂടിൽ എല്ലാ വാഗ്ദാനങ്ങളും മങ്ങിപ്പോയി. തെരഞ്ഞെടുക്കപ്പെട്ട പ്രതിനിധികൾ അധികാരത്തിൾ എത്തിയതോടെ തെരുവ് നായ പ്രശ്‌നം പ്രാദേശിക അജണ്ടയിൽ നിന്ന് അപ്രത്യക്ഷമായി. കുട്ടികളെ സ്‌കൂളിൽ അയക്കാൻ രക്ഷിതാക്കൾ ഭയപ്പെടുന്നു. രാവിലെയും വൈകുന്നേരവും നടക്കാൻ പോകുന്ന മുതി‍ർന്നവർ നായകളെ കണ്ടാൽ മറ്റ് വഴികളിലൂടെ പോകേണ്ടി വരുന്നു. ചില സ്ഥലങ്ങളിൽ കടകളിലേക്കുള്ള വഴിയിൽ നായക്കൂട്ടങ്ങൾ അലഞ്ഞുതിരിയുന്നതിനാൽ ബിസിനസ്സ് തന്നെ ബാധിക്കുന്നു. തെരുവ് നായകളുടെ ആക്രമണം അനുഭവിച്ചവർക്ക് മാനസികമായും ആഘാതം സംഭവിക്കുന്നുണ്ട്. പ്രത്യേകിച്ച് കുട്ടികളിൽ നായകളോടുള്ള ഭയം ശാശ്വതമാകുന്നു. ജെസിക്ക സെറീന പോലുള്ള വിദേശ സഞ്ചാരിക‍ൾക്ക് ഇന്ത്യയെക്കുറിച്ച് ലഭിക്കുന്ന പ്രതികൂല അനുഭവം വിനോദസഞ്ചാര മേഖലയെയും ബാധിക്കുന്നു.

വിദഗ്ദ്ധർ നിർദ്ദേശിക്കുന്ന പരിഹാര മാർഗങ്ങൾ

ത്വരിത നടപടികൾ: വന്ധ്യംകരണ പദ്ധതി വിപുലമാക്കി ഒന്നിലധികം കേന്ദ്രങ്ങൾ സ്ഥാപിക്കണം. ജില്ലയുടെ വിവിധ ഭാഗങ്ങളിൽ മൊബൈൽ വന്ധ്യംകരണ യൂണിറ്റുകൾ പ്രവർത്തിക്കണം.

ആക്രമണോത്സുക നായകളെ വേർതിരിക്കൽ: പേപ്പട്ടി നായകളെയും ആക്രമണോത്സുകരായ മറ്റ് നായകളെയും തിരിച്ചറിഞ്ഞ് സുരക്ഷിത കേന്ദ്രങ്ങളിൽ ഒതുക്കണം. ഇവയെ വന്ധ്യംകരിച്ച ശേഷം തിരിച്ച് വിടാതിരിക്കണം.
ശാസ്ത്രീയമായ മാലിന്യ സംസ്‌കരണം: തുറസ്സായ സ്ഥലങ്ങളിൽ മാലിന്യം തള്ളുന്നത് കർശനമായി നിരോധിക്കണം.

സമൂഹ പങ്കാളിത്തം: റസിഡന്റ്‌സ് അസോസിയേഷനുകളും സന്നദ്ധ സംഘടനകളും ചേർന്ന് പ്രാദേശിക നിലയിൽ പരിഹാര പ്രവർത്തനങ്ങൾ ആസൂത്രണം ചെയ്യണം.