സഹയാത്രികയുടെ സ്വർണമാല മോഷ്‌ടിച്ചു; പഞ്ചായത്ത് പ്രസിഡന്റ് പിടിയിൽ

ചെന്നെെ: ബസിൽ വച്ച് സഹയാത്രികയുടെ മാല മോഷ്ടിച്ച പഞ്ചായത്ത് പ്രസിഡന്റ് പിടിയിൽ. ചെന്നെെ കോയമ്പേടിലാണ് സംഭവം നടന്നത്. തിരുപ്പത്തൂർ ജില്ലയിലെ നരിയമ്പട്ട് പഞ്ചായത്ത് പ്രസിഡന്റും ഡിഎംകെ വനിതാ വിഭാഗം നേതാവുമായ ഭാരതിയെയാണ് (56) അറസ്റ്റ് ചെയ്തത്.

കാഞ്ചീപുരത്ത് നടന്ന വിവാഹ സൽക്കാരത്തിൽ പങ്കെടുത്ത ശേഷം ബസിൽ വീട്ടിലേക്ക് മടങ്ങുകയായിരുന്ന നേർക്കുണ്ട്രം സ്വദേശി വരലക്ഷ്‌മിയുടെ നാല് പവൻ തൂക്കമുള്ള മാലയാണ് കാണാതായത്. സിസിടിവി ദൃശ്യങ്ങളുടെ സഹായത്തോടെ നടത്തിയ അന്വേഷണത്തിലാണ് മാല ഭാരതിയാണ് മോഷ്ടിച്ചതെന്ന് പൊലീസ് കണ്ടെത്തിയത്.

കോയമ്പേട് ബസ് സ്റ്റാൻഡിൽ ഇറങ്ങിയ വരലക്ഷ്മി തന്റെ ബാഗ് പരിശോധിച്ചപ്പോളാണ് കെെവശമുണ്ടായിരുന്ന നാല് പവൻ സ്വർണമാല നഷ്ടപ്പെട്ട വിവരം തിരിച്ചറിഞ്ഞത്. തുടർന്ന് ഇവർ കോയമ്പേട് പൊലീസ് സ്റ്റേഷനിൽ എത്തി പരാതി നൽകി. സിസിടിവി ദൃശ്യങ്ങൾ പരിശോധിച്ചപ്പോൾ വരലക്ഷ്മിയുടെ ബാഗിൽ നിന്ന് ഒരു സ്ത്രീ മാല എടുക്കുന്നതായി പൊലീസ് കണ്ടെത്തി.

അന്വേഷണത്തിൽ അത് തിരുപ്പത്തൂർ ജില്ലയിലെ നരിയമ്പട്ട് പഞ്ചായത്ത് പ്രസിഡന്റാണെന്ന് കണ്ടെത്തുകയായിരുന്നു. തിരുപ്പത്തൂർ, വെല്ലൂർ, അമ്പൂർ എന്നിവിടങ്ങളിൽ ഭാരതിക്കെതിരെ നിരവധി കേസുകൾ നിലവിലുണ്ടെന്ന് പൊലീസ് പറയുന്നു. അറസ്റ്റ് ചെയ്ത ഭാരതിയെ കോടതി ജുഡീഷ്യൽ കസ്റ്റഡിയിൽ റിമാൻഡ് ചെയ്തിട്ടുണ്ട്.