അറുപതുകാരിയുടെ മരണം കൊലപാതകം: ബന്ധു അറസ്റ്റിൽ

ബാലരാമപുരം: ബാലരാമപുരം പാറക്കുഴി ബിന്ദുഭവനിൽ അറുപതുകാരി സുഗുണാദേവി മരിച്ചനിലയിൽ കാണപ്പെട്ട സംഭവത്തിൽ ബന്ധുവിനെ ബാലരാമപുരം പൊലീസ് അറസ്റ്രുചെയ്തു. പാറക്കുഴി മേക്കേക്കര ബിന്ദു ഭവനിൽ നന്ദകുമാർ എന്ന നന്ദു (25)​ ആണ് അറസ്റ്റിലായത്. നന്ദകുമാറിന്റെ ഭാര്യയുടെ മുത്തശ്ശിയാണ് മരിച്ച സുഗുണാദേവി. ഇവർക്കൊപ്പം അവരുടെ വീട്ടിലാണ് നന്ദകുമാറും ഭാര്യയും താമസിച്ചിരുന്നത്. സംഭവസ്ഥലത്ത് നന്ദകുമാറിന്റെ സാന്നിദ്ധ്യത്തിൽ തെളിവെടുപ്പു നടത്തി. കൂലിപ്പണിക്കാരനാണിയാൾ. കൃത്യം നടത്താൻ ഉപയോഗിച്ച കട്ടിലിന്റെ ഇരുമ്പ് കാൽ, സ്കൂഡ്രൈവർ എന്നിവ പൊലീസ് കണ്ടെടുത്തു.

പൊലീസ് പറയുന്നത് ഇങ്ങനെ: മാർച്ച് ഒന്നിന് രാവിലെ 7 മണിയോടെ ബാത്ത് റൂമിലേക്ക് പോകവെ സ്ലാബിൽ തട്ടിവീണ് സുഗുണാദേവി മരിച്ച നിലയിൽ കാണപ്പെട്ടുവെന്നാണ് നന്ദകുമാർ ആദ്യം നൽകിയ മൊഴി. അസ്വാഭാവികത തോന്നിയതോടെ കൂടുതൽ ചോദ്യം ചെയ്യലിൽ കൊലപാതകം സ്ഥിരീകരിക്കുകയായിരുന്നു. പോസ്റ്റ് മോർട്ടം റിപ്പോർട്ടിൽ, സ്ക്രൂഡ്രൈവർ കൊണ്ട് തലയ്ക്കടിക്കുകയും ഇരുമ്പ് കട്ടിലിന്റെ കാൽകൊണ്ട് നെഞ്ചിലും ദേഹത്തും പരിക്കേൽപ്പിക്കുകയുമായിരുന്നു. കൃത്യം നടത്തി പുറത്തേക്ക് പോയതിനു പിന്നാലെ പ്രതി തന്നെ പൊലീസിൽ വിളിച്ചറിയിക്കുകയായിരുന്നു. ഭാര്യ ഗർഭിണിയാണെന്നും അഞ്ച് മാസത്തേക്ക് സുഗുണാദേവിയെ മാറ്റിപ്പാർപ്പിക്കണമെന്നും നന്ദകുമാർ സുഗുണാദേവിയുടെ മകനോടും ബന്ധുക്കളോടും ആവശ്യപ്പെട്ടെങ്കിലും ആരും കൂട്ടാക്കിയില്ല. ഇതേച്ചൊല്ലി ഭാര്യയുമായി വഴക്കും നടന്നിരുന്നു.സുഗുണാദേവിയെ ആരും ഏറ്റെടുക്കാൻ തയ്യാറായില്ലെന്നും ബന്ധുക്കൾ സംരക്ഷണമൊരുക്കിയില്ലെന്നും പൊലീസിന് ഇയാൾ മൊഴി നൽകിയിട്ടുണ്ട്. റൂറൽ എസ്.പി,നെയ്യാറ്റിൻകര എ.എസ്.പി,​ ക്രൈംബ്രാഞ്ച് ഡിവൈ.എസ്.പി,​ ബാലരാമപുരം സി.ഐ ശ്രീകാന്ത് മിശ്ര,​ എസ്.ഐ അജിത്കുമാർ എന്നിവരുടെ നേതൃത്വത്തിലുള്ള അന്വേഷണസംഘം പ്രതിയെ ചോദ്യം ചെയ്ത് അറസ്റ്ര് രേഖപ്പെടുത്തുകയായിരുന്നു.