എസ്.എൻ.സ്വാമി ഇനി സംവിധായകൻ, ധ്യാനും അപർണ ദാസും പ്രധാനവേഷങ്ങളിൽ

സി.ബി.ഐ സീരീസുകളുടെ തോഴൻ എസ്.എൻ സ്വാമി സംവിധായകനാകുന്നു.ധ്യാൻ ശ്രീനിവാസൻ ആണ് സ്വാമിയുടെ ആദ്യ ചിത്രത്തിലെ നായകൻ.രണ്ടു നായികമാരിൽ ഒരാൾ അപർണ ദാസാണ്. ജേക്കബ് ഗ്രിഗറി ആണ് മറ്റൊരു താരം.വിഷു ദിനത്തിൽ ചിത്രത്തിന്റെ പൂജ നടക്കുമെന്ന് എസ്.എൻ. സ്വാമി പറഞ്ഞു.ചിത്രത്തിന്റെ രചനയും സ്വാമിയുടേതാണ്.

തമിഴ് ബ്രാഹ്മണ പശ്ചാത്തലത്തിൽ ഒരുങ്ങുന്ന പ്രണയ കഥയാണ് ചിത്രത്തിന്റേത്. 72-ാം വയസിലാണ് എസ്.എൻ. സ്വാമി സംവിധായകനായി അരങ്ങേറ്റം നടത്തുന്നത്.തമിഴ്നാട്ടിലെ തിരുച്ചെന്തിരൂർ ആണ് ചിത്രത്തിന്റെ പ്രധാന ലൊക്കേഷൻ. എറണാകുളത്തപ്പൻ ക്ഷേത്രക്ഷേമസമിതി പ്രസിഡന്റ് പി. രാജേന്ദ്ര പ്രസാദ് ആണ് നിർമ്മാണം. സ്വാമിയുടെ മകൻ ശിവറാം ആണ് ചിത്രത്തിന്റെ സഹ സംവിധായകൻ. 1980 ൽപുറത്തിറങ്ങിയ ചക്കരയുമ്മ എന്ന ചിത്രത്തിലൂടെയാണ് തിരക്കഥാകൃത്തായി എസ്.എൻ. സ്വാമി വെള്ളിത്തിരയിലേക്ക് എത്തുന്നത്. ഇരുപതാം നൂറ്റാണ്ട് എന്ന മോഹൻലാൽ ചിത്രവും ആ സിനിമയുടെ സൂപ്പർ ഹിറ്റ് വിജയവും സ്വാമിക്ക് വലിയ പ്രശസ്തി നൽകി. പിന്നാലെ എത്തിയ സി.ബി. എെ ഡയറിക്കുറിപ്പും വലിയ വിജയം നേടി.

സി.ബി.ഐ സീരീസ് ചിത്രങ്ങളുടെ രചയിതാവ് എന്ന നിലയിൽ റെക്കോർഡിന് ഉടമയാണ് സ്വാമി.പോയവർഷം സി.ബി.ഐ സീരീസിലെ സി.ബി.ഐ 5- ദ് ബ്രെയ്ൻ ആണ് എസ്.എൻ. സ്വാമി രചന നിർവഹിച്ച അവസാന ചിത്രം. മമ്മൂട്ടി - കെ. മധു എസ്.എൻ. സ്വാമി ടീം 17 വർഷങ്ങൾക്കുശേഷം തിരിച്ചുവരവ് നടത്തി എന്ന പ്രത്യേകത കൂടിയുണ്ട്.