അമല പോൾ വീണ്ടും വിവാഹിതയാവുന്നു

നടി അമലപോളും സുഹൃത്ത് ജഗദ് ദേശായിയും വിവാഹിതരാവുന്നു. അമലയെ പ്രൊപ്പോസ് ചെയ്യുന്ന വീഡിയോ പങ്കുവച്ച് ജഗദ് തന്നെയാണ് ഇക്കാര്യം സമൂഹമാദ്ധ്യമങ്ങളിലൂടെ വെളിപ്പെടുത്തിയത്. ''മൈ ജിപ്സി ക്യൂൻ യെസ് പറഞ്ഞു "" എന്നാണ് വീഡിയോയുടെ അടിക്കുറിപ്പ്. ഇരുവരും ഹോട്ടലിൽ ഭക്ഷണം കഴിക്കാനിരിക്കുമ്പോൾ പെട്ടെന്ന് ഡാൻസേഴ്സിന്റെ അടുത്തെത്തി അവർക്കൊപ്പം ചേരുകയാണ് ജഗദ്. ഡാൻസ് കളിക്കുന്നതിനിടെ മോതിരമെടുത്ത് അമലയെ പ്രൊപ്പോസ് ചെയ്യുകയായിരുന്നു. അമല സന്തോഷത്തോടെ മോതിരം സ്വീകരിക്കുന്നതും ജഗദിന് സ്നേഹ ചുംബനം നൽകുന്നതും വീഡിയോയിൽ കാണാം. വെഡ്ഡിംഗ് ബെൽസ് എന്ന ഹാഷ് ടാഗും വീഡിയോയ്ക്കൊപ്പം ചേർത്തിട്ടുണ്ട്. 2004 ൽ തമിഴ് സംവിധായകൻ എ. എൽ വിജയ്‌യിനെ വിവാഹം ചെയ്തെങ്കിലും 2015 ൽ ഇവർ വിവാഹമോചിതരായി. പിന്നീട് ഗായകനും മുംബയ് സ്വദേശിയുമായ ഭവ്നിന്ദർ സിംഗുമായി അമല ലിവിംഗ് റിലേഷനിലായിരുന്നു. ഇരുവരും വിവാഹിതരായി എന്ന രീതിയിൽ വാർത്തകളും ചിത്രങ്ങളും പ്രചരിച്ചിരുന്നു. എന്നാൽ തന്റെ അനുമതി ഇല്ലാതെ ഭവ്നിന്ദർ ശ്രമം നടത്തിയെന്നും സാമ്പത്തിക ക്രമക്കേടു നടത്തി എന്നും വിശദീകരണവുമായി അമല രംഗത്തു വന്നിരുന്നു.