'സിനിമ നിയന്ത്രിക്കേണ്ടത് സംവിധായകനും നി‌ർമാതാവുമാണ്, അല്ലാതെ താരങ്ങളല്ല'; ഇപ്പോഴത്തേത് ദുരവസ്ഥ

ഇപ്പോഴത്തെ സിനിമകൾ പ്രേക്ഷകർ ഓർക്കുന്നില്ലെന്ന് സംവിധായകൻ കമൽ. മലയാളസിനിമയിൽ നിലനിൽക്കുന്ന പ്രതിസന്ധി വളരെ വലുതാണെന്നും അദ്ദേഹം പറഞ്ഞു. സിനിമകളുടെ പ്രമോഷനുകളിൽ പോലും സംവിധായകർക്ക് സ്ഥാനം ലഭിക്കാത്ത അവസ്ഥയാണെന്നും കമൽ കൂട്ടിച്ചേർത്തു. ഒരു യൂട്യൂബ് ചാനലിന് അനുവദിച്ച അഭിമുഖത്തിലാണ് അദ്ദേഹം ഇക്കാര്യങ്ങൾ പങ്കുവച്ചത്.

'മുൻപ് പരാജയപ്പെട്ട സിനിമകൾ വരെ ജനങ്ങളുടെ മനസിലുണ്ടായിരുന്നു. ഇപ്പോൾ വിജയിച്ച സിനിമകൾ പോലും ആരും ഓർക്കുന്നില്ല. ഇത് പുതിയ സംവിധായകർ നേരിടുന്ന പ്രതിസന്ധിയാണ്. സിനിമയുടെ സെ​റ്റിൽ പല താരങ്ങളും പ്രശ്നങ്ങൾ ഉണ്ടാക്കുന്നുണ്ട്. അത് മ​റ്റൊരു പ്രതിസന്ധിയാണ്. ആദ്യത്തെ സിനിമ സൂപ്പർ ഹി​റ്റാക്കിയ പല സംവിധായകരും അടുത്ത ചിത്രം നിർമിക്കാൻ വർഷങ്ങളോളം കാത്തിരിക്കുന്ന അവസ്ഥയാണ്. താരങ്ങളുടെ പിറകെ പോകുന്നതാണ് പ്രശ്നം. പല സംവിധായകർക്ക് സിനിമയിൽ വ്യക്തി മുദ്ര പതിപ്പിക്കാൻ സാധിക്കുന്നില്ല.

ഒരു സംവിധായകന്റെ പേരിൽ അല്ല സിനിമ അറിയപ്പെടുന്നത്. എല്ലാവരും താരങ്ങളുടെ പ്രശ്നമാണ് പറയുന്നത്. സംവിധായകരുടെ പ്രശ്നം മനസിലാക്കുന്നില്ല. അടുത്തിടെ റിലീസ് ചെയ്ത ചിത്രങ്ങളിൽ ഹി​റ്റായി മാറിയത് രോമാഞ്ചം എന്ന ചിത്രമായിരുന്നു. ആ ചിത്രത്തിന്റെ സംവിധായകനെക്കുറിച്ച് ആരും പറയുന്നില്ല.അതുകൊണ്ട് സംവിധായകരുടെ നിലനിൽപ്പ് പ്രധാനപ്പെട്ടതാണ്. പ്രമോഷൻ പരിപാടികളിൽ പോലും സംവിധായകരില്ല. പ്രമോഷന് എത്തുന്ന താരങ്ങൾ സിനിമയെക്കുറിച്ചല്ലല്ലോ സംസാരിക്കുന്നത്. അവർ എന്തൊക്കെയോ കാര്യങ്ങൾ പറയുന്നു. അത് വൈറലാകുന്നു. അതാണോ സിനിമയുടെ പ്രമോഷൻ?

അതുകൊണ്ട് നിർമാതാക്കൾക്ക് ലാഭമില്ല. താരങ്ങളാരും സിനിമയുടെ സംവിധായകരെ പ്രമോഷനുകളിൽ പരിചയപ്പെടുത്തുന്നില്ല. ഒരു സിനിമ സംവിധായകന്റെയും നിർമാതാവിന്റെയുമാണ്. സിനിമയുടെ നിയന്ത്രണം ഇവരുടെ കൈയിൽ വരാത്തതാണ് പ്രതിസന്ധിക്ക് കാരണം. ഒരു താരത്തെ ആശ്രയിച്ചാണ് സിനിമ ഉണ്ടാകുന്നത്. പുതിയ സംവിധായകന് സിനിമ കിട്ടണമെങ്കിൽ താരം കനിയേണ്ട അവസ്ഥയാണ്. ഞാൻ സിനിമകൾ ചെയ്ത് തുടങ്ങിയ സമയത്ത് നിർമാതാവിന്റെ അടുത്താണ് ആദ്യം കഥ പറയുന്നത്. അത് നിർമാതാവിന് ഇഷ്ടപ്പെട്ടതിന് ശേഷമാണ് സിനിമയിൽ ആര് അഭിനയിക്കുമെന്ന് തീരുമാനിക്കുന്നത്.

ഇപ്പോഴുളള നിർമാതാവിന് സിനിമയുടെ കഥ പോലും അറിയാത്ത അവസ്ഥയാണ്. ഇപ്പോഴുളള താരങ്ങൾ ഈ പ്രവണയതാണ് കാണുന്നത്. ഇതൊക്കെ ചർച്ച ചെയ്യേണ്ടതാണ്. അതൊക്കെ മാറണമെങ്കിൽ എല്ലാവരും സഹകരിക്കണം. സൂപ്പർതാരങ്ങൾ പലരും പ്രതിഫലമില്ലാതെ സിനിമകൾ ചെയ്തിട്ടുണ്ട്. മമ്മൂട്ടിയും മോഹൻലാലും ഒരുപാട് സംഭാവനകൾ ചെയ്തിട്ടുണ്ട്. അവരെ പോലെ മ​റ്റുളളവർ പറയുന്നത് ശരിയല്ല. അതൊക്കെ ചിന്തിക്കണം'- കമൽ പറഞ്ഞു.