സർക്കാർ ജീവനക്കാർക്ക് 3% ക്ഷാമബത്ത അനുവദിച്ചു

തിരുവനന്തപുരം: സർക്കാർ ജീവനക്കാർക്കും അദ്ധ്യാപകർക്കും പെൻഷൻകാർക്കും 3% ക്ഷാമബത്ത അനുവദിച്ച് സർക്കാർ ഉത്തരവായി. ജീവനക്കാർക്ക് ഫെബ്രുവരിയിലെ ശമ്പളത്തിനൊപ്പവും പെൻഷൻകാർക്ക് മാർച്ചിലെ പെൻഷനൊപ്പവും പുതിയ ക്ഷാമബത്ത ലഭിക്കും. എയ്ഡഡ് സ്‌കൂൾ, പ്രൈവറ്റ് കോളേജ്, പോളിടെക്നിക് അദ്ധ്യാപകർക്കും തദ്ദേശ സ്വയംഭരണ സ്ഥാപനങ്ങളിലെ ജീവനക്കാർക്കും പ്രയോജനം ലഭിക്കും. സംസ്ഥാന പൊതുമേഖലാ സ്ഥാപനങ്ങൾ, ബോർഡുകൾ, ഗ്രാൻഡ്ഇൻഎയ്ഡ് സ്ഥാപനങ്ങൾ എന്നിവർക്ക് അവരുടെ സ്വന്തം ഫണ്ടിൽ നിന്ന് വർദ്ധനവ് നൽകണമെന്നും ഉത്തരവിലുണ്ട്. നിലവിലെ വർദ്ധനവോടെ സംസ്ഥാനത്തെ ജീവനക്കാർക്ക് ശമ്പളത്തിനൊപ്പം കിട്ടുന്ന ഡി.എ 25% ആകും. ഇനി 12% ആണ് കിട്ടാനുള്ളത്. 2023 ജൂലായിൽ പ്രഖ്യാപിച്ച 3% ആണ് ഇപ്പോൾ അനുവദിക്കുന്നത്. എന്നാൽ അന്നുമുതലുള്ള കുടിശിക അനുവദിച്ചിട്ടില്ല. അതിനുവേറെ ഉത്തരവിറക്കിയേക്കും.