തൊഴിലുറപ്പിന് കരുതലായി 1,000 കോടി

തിരുവനന്തപുരം: പരിഷ്കരിച്ച തൊഴിലുറപ്പ് പദ്ധതി കേന്ദ്രം കൊണ്ടുവന്നെങ്കിലും സംസ്ഥാനത്തെ തൊഴിലുറപ്പ് പദ്ധതി സുഗമമായി മുന്നോട്ട് കൊണ്ടുപോകുന്നതിന് 1,000 കോടി രൂപ ബഡ്ജറ്റിൽ അധികമായി വകയിരുത്തി. ഗ്രാമീണ മേഖലയിലെ തൊഴിൽ സുരക്ഷ ഉറപ്പാക്കുന്നതിൽ കേരളം കൈവരിച്ച നേട്ടങ്ങൾ നിലനിറുത്താനാണ് സാമ്പത്തിക ഞെരുക്കത്തിനിടയിലും അധിക തുക അനുവദിച്ചത്.

കൂടാതെ തൊഴിലുറപ്പ് പദ്ധതിയിൽ 100 ദിവസം പൂർത്തിയാക്കുന്ന പട്ടികവർഗ ഗുണഭോക്താക്കൾക്ക് അധികമായി 100 ദിവസം തൊഴിൽ നൽകുന്ന കേരള ട്രൈബൽ പ്ലസ് പദ്ധതി തുടരുന്നതിന് 49.82 കോടിയും വകയിരുത്തി.

തൊഴിലുറപ്പ് പദ്ധതിയുടെ ആകെ ചെലവിന്റെ 60% മാത്രം കേന്ദ്രം ഏറ്റെടുക്കുന്നതും തൊഴിൽ ദിനങ്ങൾ നിശ്ചിത എണ്ണത്തിലേക്ക് ചുരുക്കിയതും വലിയ തിരിച്ചടിയാണെന്ന് ബഡ്ജറ്റ് പ്രസംഗത്തിൽ ധനമന്ത്രി കെ.എൻ.ബാലഗോപാൽ ചൂണ്ടിക്കാട്ടി. കേരളത്തിന് അർഹമായ സാമ്പത്തിക വിഹിതം കേന്ദ്രം വെട്ടിക്കുറയ്ക്കുന്നതിനിടയിലാണ് പദ്ധതിയെത്തന്നെ ഇല്ലാതാക്കുന്ന തരത്തിലുള്ള ഇത്തരം നീക്കങ്ങൾ നടക്കുന്നത്.

കേന്ദ്ര നയങ്ങൾ തിരുത്തിക്കാനുള്ള ശ്രമങ്ങൾ തുടരുന്നതിനോടൊപ്പം നിലവിൽ പദ്ധതിയെ ആശ്രയിച്ചു കഴിയുന്ന ലക്ഷക്കണക്കിന് തൊഴിലാളികളുടെ താത്പര്യം സംരക്ഷിക്കുക എന്നതാണ് സർക്കാരിന്റെ ലക്ഷ്യം. ഇതിനായാണ് മുൻ വർഷത്തേക്കാൾ 1,000 കോടി അധികമായി നൽകുന്നത്. ഇതോടെ പദ്ധതി കുറ്റമറ്റ രീതിയിൽ നടപ്പിലാക്കാൻ സാധിക്കുമെന്ന് ധനമന്ത്രി പ്രത്യാശ പ്രകടിപ്പിച്ചു.