തിരുവനന്തപുരം: സംസ്ഥാന സർക്കാരിന്റെ 'വനിതകളുടെ സംവിധാനത്തിലുള്ള സിനിമ', പട്ടികജാതി -പട്ടികവർഗ വിഭാഗത്തിൽപ്പെടുന്ന സംവിധായകരുടെ സിനിമ' പദ്ധതികളിൽ കേരള സംസ്ഥാന ചലച്ചിത്ര വികസന കോർപ്പറേഷൻ (കെ.എസ്.എഫ്.ഡി.സി) അടുത്ത വർഷം നാല് സിനിമകൾ നിർമ്മിക്കും. വനിതാ വിഭാഗത്തിൽ ശിവരഞ്ജിനി ജെ.യുടെ 'വിക്ടോറിയ', ഫർസാന പി.യുടെ 'മുംതാ' എന്നീ തിരക്കഥകളും പട്ടികജാതി -പട്ടികവർഗ വിഭാഗത്തിൽ മനോജ്കുമാർ സി.എസിന്റെ 'പ്രളയശേഷം ഒരു ജലകന്യക', സുനീഷ് വടക്കുമ്പാടന്റെ 'കാടു' എന്നിവയും തിരഞ്ഞെടുക്കപ്പെട്ടു.

2019-20ൽ ആരംഭിച്ച 'വനിതകളുടെ സംവിധാനത്തിലുള്ള സിനിമ' പദ്ധതിയിൽ ആദ്യ സിനിമയായ താര രാമാനുജന്റെ 'നിഷിദ്ധോ', രണ്ടാമത്തെ ചിത്രമായ മിനി ഐ.ജി.യുടെ 'ഡിവോഴ്സ്' എന്നിവ പ്രദർശനത്തിനൊരുങ്ങുന്നു. 2020-21 ൽ തിരഞ്ഞെടുക്കപ്പെട്ട ശ്രുതി നമ്പൂതിരി സംവിധാനം ചെയ്ത 'ബി 3244', ഇന്ദു വി.ആറിന്റെ 'നിള' എന്നിവയുടെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. 2020-21 ലാണ് 'പട്ടികജാതി, പട്ടികവർഗ വിഭാഗത്തിൽപ്പെടുന്ന സംവിധായകരുടെ സിനിമ' പദ്ധതി ആവിഷ്‌കരിച്ചത്. ഇതിൽ തെരഞ്ഞെടുക്കപ്പെട്ട വി.എസ്.സനോജിന്റെ 'അരിക്', അരുൺ ജെ.മോഹന്റെ 'പിരതി' എന്നിവയുടെ നിർമ്മാണം പുരോഗമിക്കുകയാണ്.