ഡോ എം ആർ രാഘവ വാര്യർക്ക് കേരളജ്യോതി പുരസ്കാരം,​ പി ബി അനീഷിനും രാജശ്രീ വാര്യർക്കും കേരളപ്രഭ

തിരുവനന്തപുരം : കേരളപ്പിറവിയോട് അനുബന്ധിച്ച് സംസ്ഥാന സർക്കാർ നൽകുന്ന കേരള പുരസ്കാരങ്ങൾ പ്രഖ്യാപിച്ചു. വിവിധ മേഖലകളിലെ സംഭാവനകൾ പരിഗണിച്ചാണ് പത്മ പുരസ്കാര മാതൃകയിൽ സംസ്ഥാന സർക്കാർ കേരള ജ്യോതി കേരളപ്രഭ,​ കേരളശ്രീ പുരസ്കാരങ്ങൾ നൽകുന്നത്.

വിദ്യാഭ്യാസ മേഖലയിലെ സമഗ്ര സംഭാവന കണക്കിലെടുത്ത് ഡോ. എം.ആർ. രാഘവ വാര്യർക്ക് കേരള ജ്യോതി പുരസ്കാരം നൽകും. കാർഷിക മേഖലയിലെ സംഭാവനകൾക്ക് പി.ബി. അനീഷിനും കലാരംഗത്തെ സംഭാവനകൾക്ക് രാജശ്രീ വാര്യർ‌ക്കും കേരളപ്രഭ പുരസ്കാരം നൽകും മാദ്ധ്യമ പ്രവർത്തനത്തിന് ശശികുമാർ,​ വിദ്യാഭ്യാസ രംഗത്ത് ടി.കെ.എം ട്രസ്റ്റ് ചെയർമാൻ ഷഹൽ ഹസൻ മുസലിയാർക്കും സ്റ്റാർട്ടപ്പ് രംഗത്തെ സംഭാവനകൾക്ക് എം.കെ. വിമൽ ഗോവിന്ദിനും വിവിധ മേഖലകളിലെ പ്രവർത്തനങ്ങൾ പരിഗണിച്ച് ജിലുമോൾ മാരിയറ്റ് തോമസിനും കായികരംഗത്ത് അഭിലാഷ് ടോമിക്കും കേരളശ്രീ പുരസ്കാരം നൽകും. കേരളജ്യോതി പുരസ്കാരം ഒരാൾക്കും കേരള പ്രഭ രണ്ടുപേർക്കും കേരളശ്രീ അഞ്ചുപേർക്കുമാണ് ഓരോ വർഷവുംനൽകി വരുന്നത്.