മെസിക്കും നെയ്മറിനും ഇന്ന് ക്വാർട്ടർ പരീക്ഷ

ലോകകപ്പിന്റെ ആദ്യ ക്വാർട്ടർ ഫൈനലിൽ ഇന്ന് ബ്രസീൽ- ക്രൊയേഷ്യ

ഇന്ത്യൻ സമയം രാത്രി 8.30 മുതൽ

രണ്ടാം ക്വാർട്ടർ ഫൈനലിൽ അർജന്റീനയ്ക്ക് എതിരാളികൾ ഹോളണ്ട്

രാത്രി 12.30 മുതൽ

ദോഹ: ഖത്തർ ലോകകപ്പിൽ ആവേശത്തിരയിളക്കി ഇന്നും നാളെയുമായി വമ്പന്മാരുടെ ക്വാർട്ടർ ഫൈനൽ പോരാട്ടങ്ങൾ. സെമി ഫൈനലിൽ സ്ഥാനമുറപ്പിക്കാനായി അഞ്ചുവട്ടം ചാമ്പ്യന്മാരായ ബ്രസീലും കഴിഞ്ഞ ലോകകപ്പിലെ റണ്ണർ അപ്പായ ക്രൊയേഷ്യയുമാണ് ആദ്യമിറങ്ങുന്നത്. പിന്നാലെ അർജന്റീന- ഹോളണ്ട് പോരാട്ടം. സ്പെയ്‌നിനെ അട്ടിമറിച്ച് കറുത്ത കുതിരകളായി മാറിയ മൊറോക്കോയും പോർച്ചുഗലും തമ്മിലുള്ള ക്വാർട്ടർ ഫൈനലും നിലവിലെ ചാമ്പ്യന്മാരായ ഫ്രാൻസും ഇംഗ്ളണ്ടും തമ്മിലുള്ള മത്സരവും നാളെയാണ്.

ലൂക്കയോട് തൊടുക്കാൻ നെയ്മർ

 2018 ലോകകപ്പിലെ മികച്ച താരമായിരുന്ന ക്യാപ്ടൻ ലൂക്കാ മൊഡ്രിച്ച് കളി മെനയുന്ന ക്രൊയേഷ്യയെ മറികടക്കുകയാണ് ബ്രസീലിന്റെ വെല്ലുവിളി.

 നാലുമത്സരങ്ങളിൽ രണ്ടുഗോളുകൾ മാത്രം വഴങ്ങിയ ക്രൊയേഷ്യൻ പ്രതിരോധത്തെ കീറിമുറിക്കാൻ നെയ്മർ,വിനീഷ്യസ്,കാസിമെറോ ത്രയത്തിന് കഴിയുമോയെന്നത് ആരാധകരുടെ നെഞ്ചിടിപ്പ് കൂട്ടുന്നു.

പ്രീ ക്വാർട്ടറിൽ ഏഷ്യൻ വെല്ലുവിളി മറിക‌ടന്നാണ് ഇരുടീമുകളും അവസാന എട്ടിലെത്തിയത്. ക്രൊയേഷ്യ ജപ്പാനെ ഷൂട്ടൗട്ടിൽ തോൽപ്പിച്ചപ്പോൾ ബ്രസീൽ ദക്ഷിണ കൊറിയയെ 4-1ന് കീഴടക്കി.

4

തവണ ഇതിന് മുമ്പ് ക്രൊയേഷ്യയും ബ്രസീലും ഏറ്റുമുട്ടിയതിൽ മൂന്ന് ജയം ബ്രസീലിന്. ഒരു കളി സമനില.

മെസിയെ തടുക്കാൻ വാൻഡിക്ക്

ലോകത്തെ ഏറ്റവും മികച്ച സ്ട്രൈക്കർമാരിൽ ഒരാളായ മെസിയും ബെസ്റ്റ് ഡിഫൻഡറായ വിർജിൽ വാൻഡിക്കും തമ്മിലുള്ള പോരാട്ടമാകും രണ്ടാം ക്വാർട്ടറിൽ.

ആദ്യ കളിയിൽ തോറ്റെങ്കിലും മെസിയുടെ കരുത്തിൽ ശക്തമായി തിരിച്ചുവന്ന ടീമാണ് അർജന്റീന. പ്രീ ക്വാർട്ടറിൽ ഓസ്ട്രേലിയയെ തോൽപ്പിച്ചത് 2-1ന്.

ഒരു കളിപോലും തോൽക്കാതെയാണ് ഹോളണ്ടിന്റെ വരവ്. പ്രീ ക്വാർട്ടറിൽ അമേരിക്കയ്ക്കെതിരെ നേടിയത് 3-1ന്റെ ആധികാരിക ജയം.

9

തവണ ഇരുടീമുകളും ഏറ്റുമുട്ടിയപ്പോൾ ഹോളണ്ടിന് നാലുജയം, അർജന്റീനയ്ക്ക് മൂന്നും. രണ്ട് സമനിലകൾ.

ഇന്ന് ജയിച്ചാൽ ബ്രസീലും അർജന്റീനയും ആദ്യ സെമിയിൽ ഏറ്റുമുട്ടും