സ്കൂളുകളി​ൽ​ 6005 അധി​ക തസ്തി​ക,​ 5906 അദ്ധ്യാപകർ,​ 99 അനദ്ധ്യാപകർ,​ മൂന്നൂ വർഷത്തിന് ശേഷം തസ്തിക നിർണയം പൂർത്തിയായി

തി​രുവനന്തപുരം: ആറായിരത്തിലേറെപ്പേർക്ക് ജോലിക്ക് വഴി തുറന്ന് മൂന്നു വർഷത്തിനു ശേഷം സംസ്ഥാനത്തെ സ്കൂളുകളി​ൽ അധിക തസ്തി​ക നി​ർണയം പൂർത്തി​യായി​. 2313 സ്കൂളുകൾക്കായി 6005 അധി​ക തസ്തിക സൃഷ്ടിക്കാനുള്ള ശുപാർശ പൊതുവി​ദ്യാഭ്യാസ വകുപ്പ് ധന വകുപ്പി​ന് കൈമാറി. ധനവകുപ്പിന്റെ അംഗീകാരം ലഭിക്കുന്ന മുറയ്ക്ക് നിയമന നടപടി ഊർജ്ജിതമാക്കുമെന്ന് മന്ത്രി വി. ശിവൻകുട്ടി പറഞ്ഞു.

5906 അദ്ധ്യാപക തസ്തി​കകളും 99 അനദ്ധ്യാപക തസ്തി​കകളുമാണ്. 1106 സർക്കാർ സ്‌കൂളുകളിൽ 3080 തസ്തികകളും 1207 എയിഡഡ് സ്‌കൂളുകളിൽ 2925 തസ്തികകളും. ആറാം പ്രവൃത്തി​ ദി​നത്തി​ലെ കണക്കെടുപ്പനുസരി​ച്ച് അധി​കമായി​ വന്ന കുട്ടി​കളുടെ എണ്ണത്തി​ന് ആനുപാതി​കമായാണ് അധി​ക തസ്തി​ക കണക്കാക്കിയിരി​ക്കുന്നത്.

ഏറ്റവും കൂടുതൽ അധിക തസ്തികകൾ മലപ്പുറം ജി​ല്ലയി​ലാണ്. സർക്കാർ - 694,

എയ്ഡഡ് -889. ഏറ്റവും കുറവ് പത്തനംതിട്ടയിലും - 62.

ഉദ്യോഗാർത്ഥികളുടെ ഏറെക്കാലമായുള്ള കാത്തിരിപ്പിനാണ് വിരാമമാവുന്നത്. കൊവിഡ് കാലത്ത് കുട്ടികളുടെ കണക്കെടുപ്പ് നടന്നിരുന്നില്ല. തുടർന്ന് തസ്തിക നിർണയം നീണ്ടുപോയി. ഇതിനെതിരെ ഉദ്യോഗാർത്ഥികൾ പലതവണ സമരം നടത്തുകയും വകുപ്പു മന്ത്രിക്കുൾപ്പെടെ നിവേദനം നൽകുകയും ചെയ്തിരുന്നു. അധിക തസ്തിക നിർണയം നീണ്ടുപോകുന്നതിനെക്കുറിച്ച് കേരളകൗമുദി വിവിധ വാർത്തകൾ നൽകിയിരുന്നു.

2022-23 അദ്ധ്യയന വർഷത്തെ കണക്കു പ്രകാരം സർക്കാർ, എയ്ഡഡ്, അംഗീകൃത അൺ എയ്ഡഡ് ഉൾപ്പെടെ ഒന്നു മുതൽ 10 വരെ ക്ലാസുകളിലായി ആകെ 38,32,395 കുട്ടികളുണ്ട്. ഈ അദ്ധ്യയന വർഷം ഒന്നാം ക്ലാസിൽ പ്രവേശനം നേടിയത് 3,03,168 കുട്ടികളാണ്. പൊതുവിദ്യാലയങ്ങളിൽ 2 മുതൽ 10 വരെ ക്ലാസുകളിലായി 1,19,970 കുട്ടികൾ പുതുതായി ചേർന്നു. ഇവരിൽ 44,915 പേർ സർക്കാർ വിദ്യാലയങ്ങളിലും 75,055 പേർ സർക്കാർ എയ്ഡഡ് വിദ്യാലയങ്ങളിലുമാണ് പ്രവേശനം നേടിയത്.

തസ്തികകൾ:

എച്ച്.എസ്.ടി : സർക്കാർ 740, എയിഡഡ് 568

യു.പി.എസ്.ടി : സർക്കാർ 730, എയിഡഡ് 737

എൽ.പി.എസ്.ടി : സർക്കാർ 1086, എയിഡഡ് 978

എൽ.പി, യു.പി

മറ്റു തസ്തികകൾ

(ഭാഷാദ്ധ്യാപകർ, താത്കാലികം)

സർക്കാർ :463

 എയിഡഡ്: 604

2019- 20ൽ അനുവദിച്ചതും

2022 -23ൽ നഷ്ടപ്പെട്ടതും

 സർക്കാർ :1638

 എയിഡഡ് :2925

സർക്കാർ സ്കൂളുകളിൽ

നിയമനം ഇങ്ങനെ

 പുതുതായി റിപ്പോർട്ട് ചെയ്യുന്ന അദ്ധ്യാപക ഒഴിവുകളിലേക്ക് നിലവിലുള്ള പി.എസ്.സി റാങ്ക് ലിസ്റ്റുകളിൽ നിന്ന് നിയമനം

എൽ.പി, ഹൈസ്‌കൂൾ ജില്ലാ തലത്തിലും ഹയർ സെക്കൻഡറിക്ക് സംസ്ഥാന തലത്തിലുമാണ് റാങ്ക് ലിസ്റ്റ്

 റാങ്ക് ലിസ്റ്റില്ലാത്ത വിഷയങ്ങൾക്ക് പി.എസ്.സി പുതിയ അപേക്ഷ ക്ഷണിക്കും

(എ.കെ.സാദിഖ്
പി.എസ.സി മുൻ ജോയിന്റ് സെക്രട്ടറി)