ജനശതാബ്ദി ഉള്‍പ്പെടെ മൂന്ന് ട്രെയിനുകള്‍ക്ക് ഈ സ്റ്റേഷനില്‍ സ്റ്റോപ്പ്; റെയില്‍വേയുടെ തീരുമാനം ഇങ്ങനെ

മലപ്പുറം: കേരളത്തിലൂടെ സര്‍വീസ് നടത്തുന്ന മൂന്ന് ട്രെയിനുകള്‍ക്ക് പുതിയ സ്റ്റോപ്പ് അനുവദിച്ച് റെയില്‍വേ. ഭാരതപ്പുഴയില്‍ നടക്കുന്ന മഹാമാഘ മഹോത്സവത്തിന്റെ ഭാഗമായിട്ടാണ് ജനശതാബ്ദി ഉള്‍പ്പെടെയുള്ള മൂന്ന് ട്രെയിനുകള്‍ക്ക് മലപ്പുറം ജില്ലയിലെ കുറ്റിപ്പുറം റെയില്‍വേ സ്റ്റേഷനില്‍ താത്കാലിക സ്റ്റോപ് അനുവദിച്ചിരിക്കുന്നത്. അന്ത്യോദയ എക്‌സ്പ്രസ് (ട്രെയിന്‍ നമ്പര്‍:16355), കണ്ണൂര്‍ - തിരുവനന്തപുരം ജനശതാബ്ദി (ട്രെയിന്‍ നമ്പര്‍: 12081), ചെന്നൈ - മംഗളൂരു സൂപ്പര്‍ഫാസ്റ്റ് (ട്രെയിന്‍ നമ്പര്‍: 12685) എന്നീ ട്രെയിനുകള്‍ക്കാണ് സ്റ്റോപ് അനുവദിച്ചിരിക്കുന്നത്.

1.16355 അന്ത്യോദയ എക്സ്പ്രസ് (ജനുവരി 24, 31) സമയം: പുലര്‍ച്ചെ 03:34

2. 12081 ജനശതാബ്ദി എക്സ്പ്രസ് (ജനുവരി 24, 26, 31) സമയം: രാവിലെ 06:59

3.12685 ചെന്നൈ - മംഗളൂരു സൂപ്പര്‍ഫാസ്റ്റ് (ജനുവരി 24, 25, 30, 31) സമയം: പുലര്‍ച്ചെ 02:14

കേന്ദ്രമന്ത്രി സുരേഷ് ഗോപിയാണ് ഫേസ്ബുക് പോസ്റ്റിലൂടെ ഇക്കാര്യം അറിയിച്ചത്. തിരുനാവായയിലേക്കുള്ള യാത്ര സുഗമമാക്കാന്‍ കുറ്റിപ്പുറം റെയില്‍വേ സ്റ്റേഷനില്‍ ട്രെയിനുകള്‍ക്ക് താത്കാലിക സ്റ്റോപ്പ് അനുവദിക്കണം എന്നാവശ്യപ്പെട്ട് ഭക്തജനങ്ങളും നാട്ടുകാരും തന്നെ സമീപിച്ചിരുന്നു. ഇക്കാര്യം റെയില്‍വേ മന്ത്രാലയത്തിന്റെ ശ്രദ്ധയില്‍പ്പെടുത്തുകയും അടിയന്തരമായി തന്നെ അതിന് അനുകൂലമായ തീരുമാനം ലഭ്യമാക്കുകയും ചെയ്തുവെന്നും അദ്ദേഹം പോസ്റ്റില്‍ കുറിച്ചു.