എയ്ഡഡ് സ്കൂൾ നിയമനം: പി.എസ്.സി ആവശ്യം സ്വയം നേട്ടത്തിനെന്ന് സുകുമാരൻ നായർ

കോട്ടയം : എയ്ഡഡ് സ്കൂൾ നിയമനങ്ങൾ പി.എസ്.സിക്ക് വിടണമെന്ന ആവശ്യം കൂടുതൽ നേട്ടം ഉണ്ടാക്കാമെന്ന ഒരു വിഭാഗത്തിന്റെ ഗൂഢാലോചനയുടെ ഭാഗമാണെന്ന് എൻ.എസ്.എസ് ജനറൽ സെക്രട്ടറി ജി. സുകുമാരൻ നായർ പറഞ്ഞു. നിയമനം പി.എസ്.സിക്ക് വിട്ടാൽ സംവരണത്തിലൂടെ പ്രബലവിഭാഗങ്ങളായ തങ്ങൾക്ക് തന്നെയാണ് അതിന്റെ പ്രയോജനമെന്ന് അവർക്കറിയാം. അതിന് ആക്കം കൂട്ടാനാണ് തങ്ങളുടെ സ്ഥാപനങ്ങളിലെ നിയമനങ്ങൾ പി.എസ്.സിക്ക് വിടാമെന്ന വാഗ്ദാനം മുന്നോട്ടുവയ്ക്കുന്നത്. പി.എസ്.സിക്ക് വിട്ടാൽ എയ്ഡഡ് മേഖലയിലെ വിദ്യാലയങ്ങളുടെ പുരോഗതിക്കോ നിലനിൽപ്പിനോ ഉപകരിക്കില്ല. ദോഷകരമായി ബാധിക്കുമെന്നും അദ്ദേഹം പറഞ്ഞു.