പുതുവർഷത്തിന് റെയിൽവേയുടെ സമ്മാനങ്ങൾ തീരുന്നില്ല; തിരുവനന്തപുരം  -  കാസർകോട്  വന്ദേഭാരത്  കോച്ചുകളുടെ  എണ്ണം കൂടും

തിരുവനന്തപുരം: ഈ ന്യൂ ഇയർ മുതൽ മലയാളികളുടെ ട്രെയിൻ യാത്ര കൂടുതൽ സൂുഗമമാകുന്നു. തിരുവനന്തപുരം - കാസർകോട് വന്ദേഭാരത് കോച്ചുകളുടെ എണ്ണം കൂട്ടും. നിലവിലെ16ൽ നിന്ന് 20 കോച്ചുകൾ ആക്കുമെന്നാണ് റിപ്പോർട്ട്. റെയിൽവേ ബോർഡിന്റെതാണ് തീരുമാനം. കോച്ചുകൾ കൂടുന്നതിനായി പുതിയ റേക്ക് തന്നെയാണ് എത്തിച്ചത്. നിലവിലുള്ള 16കോച്ചുകളുള്ള റേക്ക് ആലപ്പുഴ വഴി സർവ്വീസ് നടത്തുന്ന തിരുവനന്തപുരം - മംഗലാപുരം വന്ദേഭാരതിനായി ഉപയോഗിച്ചേക്കും. നിലവിൽ ഈ വന്ദേഭാരതിന് എട്ട് കോച്ചുകൾ മാത്രമാണുള്ളത്.

183ശതമാനം വരെ ഒക്യുപെൻസിയുള്ള ട്രെയിനിൽ കൺഫേം ടിക്കറ്റ് കിട്ടുക ഏറെ പ്രയാസമായിരുന്ന സ്ഥിതിക്ക് ഇതോടെ മാറ്റം വരുമെന്നാണ് വിശ്വാസം. എന്നാൽ ആലപ്പുഴ വഴിയുള്ള തിരുവനന്തപുരം - മംഗളൂരു വന്ദേഭാരതിലെ എട്ട് കോച്ചുകൾ 16 എണ്ണം ആക്കുക, എറണാകുളം - ബംഗളൂരു, തിരുവനന്തപുരം - കോയമ്പത്തൂർ വന്ദേഭാരത് സർവീസുകൾ തുടങ്ങുക എന്നീ ആവശ്യങ്ങൾ പരിഗണിച്ചില്ല. സംസ്ഥാനത്ത് രണ്ട് വന്ദേഭാരത് സർവ്വീസുകളാണുള്ളത്. രാജ്യത്ത് ഏറ്റവും കൂടുതൽ യാത്രക്കാരുള്ളതും വരുമാനമുള്ളതുമായ വന്ദേഭാരത് സർവ്വീസുകളാണ് കേരളത്തിലുള്ളത്.