'കുറ്റം തെളിയുന്നതുവരെ നിങ്ങൾ നിരപരാധി ആണ്‌', രാഹുൽ മാങ്കൂട്ടത്തിലിന് പിന്തുണയുമായി സീമ ജി നായർ

കൊച്ചി: ലൈംഗിക ആരോപണത്തെ തുടർന്ന് കോൺഗ്രസ് നേതൃത്വത്തിൽ നിന്ന് സ്‌സ്പെൻഷനിലായ എംഎൽഎ രാഹുൽ മാങ്കൂട്ടത്തിലിനെ പിന്തുണച്ച് നടി സീമ ജി. നായർ വീണ്ടും രംഗത്ത്. കുറ്റം തെളിയിക്കപ്പെടുന്നതുവരെ രാഹുൽ നിരപരാധിയാണെന്ന് സീമ ഫേസ്ബുക്ക് പോസ്റ്റിൽ കുറിച്ചു. പൊതുജനങ്ങളുടെ തിടുക്കത്തിലുള്ള വിധിന്യായത്തെ താരം വിമർശിക്കുകയും ചെയ്തു. സസ്‌പെൻഡ് ചെയ്യപ്പെട്ട രാഹുൽ നിയമസഭയിൽ എത്തിയതിനെ തുടർന്നായിരുന്നു നടിയുടെ പോസ്റ്റ്.

'വരുമോ ,വരില്ല ,വരില്ലേ ,വരാതിരിക്കില്ല ,വരുമായിരിക്കും ,വന്നു ..ഇനി വരുന്നിടത്തു വെച്ചു കാണാം അല്ലേ ..രാഹുലിന്റെ മേൽ ആരോപിക്കപ്പെട്ട കുറ്റം തെളിയുന്നതുവരെ നിങ്ങൾ നിരപരാധി ആണ്‌ . ഇപ്പോൾ നിലവിൽ ഒരു പാർട്ടിയിലും അംഗമല്ലാത്തതുകൊണ്ട് ,പ്രാഥമിക അംഗത്വം പോലും ഇല്ലാത്തതുകൊണ്ട് ,ആരെയും ധിക്കരിച്ചു എന്ന് പറയാൻ ആകില്ല ..സ്വതന്ത്രൻ ആയതുകൊണ്ട് ,സ്വന്തമായി തീരുമാനമെടുക്കാം' സീമ ജി നായർ സമൂഹമാദ്ധ്യമത്തിൽ കുറിച്ചു.

മുമ്പും ആരോപണങ്ങൾ നിരന്തരമായി നേരിട്ടിരുന്ന രാഹുലിനെ പിന്തുണച്ച് സീമ ജി നായ‌ർ രംഗത്തെത്തിയിരുന്നു. രാഹുൽ മാങ്കൂട്ടത്തിലിനെതിരായ ചർച്ചകളും പ്രതിഷേധങ്ങളും കാണുമ്പോൾ മുൻ മുഖ്യമന്ത്രി ഉമ്മൻ ചാണ്ടിക്കെതിരായ തേജോവധമാണ് ഓർമ്മ വന്നതെന്ന് സീമ നേരത്തെ പറഞ്ഞിരുന്നു. രാഹുലിനെതിരെ ഇതുവരെ ഒരു പരാതിയും ലഭിച്ചിട്ടില്ലെന്നും നടി വ്യക്തമാക്കി.ഒരു തെറ്റ് സംഭവിച്ചാൽ, രണ്ടുപേരും അതിൽ തുല്യ പങ്കാളികളാണ്. പിന്നെ എങ്ങനെയാണ് ഒരു പക്ഷത്തെ അതിന് കുറ്റപ്പെടുത്താൻ കഴിയുക? സീമ ജി നായർ മുമ്പ് ചോദിച്ചിരുന്നു.