കേരളം ജാതിയി​ലും മതത്തിലും അധിഷ്ഠിതമായി: വെള്ളാപ്പള്ളി

പറവൂർ: നവോത്ഥാന സമരഭൂമിയായ കേരളം ഇന്നും ജാതിയിലും മതത്തിലും അധിഷ്ഠിതമാണെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു. എസ്.എൻ.ഡി.പി യോഗം പറവൂർ യൂണിയനി​ൽ ശ്രീനാരായണ ദർശനോത്സവം ഉദ്ഘാടനം ചെയ്യുകയായിരുന്നു അദ്ദേഹം. ഓരോ വിഭാഗത്തിലും ജാതി ചിന്ത കൂടി വരുകയാണ്. ജാതി വിവേചനമാണ് ജാതി ചിന്തയുണ്ടാകുന്നത്. സാമൂഹ്യനീതി എല്ലാവർക്കും ലഭ്യമാകണം. ഒരു സമുദായത്തിന്റെ ഉയർച്ചയ്ക്ക് വിദ്യാഭ്യാസവും സമ്പത്തും വേണം. സംസ്ഥാനത്തി​ന്റെ വരുമാനത്തിന്റെ പകുതിയും ചെലവഴിക്കുന്നത് വിദ്യാഭ്യാസ മേഖലയ്ക്കാണ്. എയ്ഡഡ് സ്കൂളുകളിൽ നിയമനത്തിന് സർക്കാരിന് ഒരു പങ്കുമില്ല. എന്നാൽ ശമ്പളം കൊടുക്കുന്നത് സർക്കാർ. ഈ സമ്പ്രദായം ലോകത്ത് ഒരിടത്തുമില്ല. അടിസ്ഥാന വിഭാഗങ്ങൾക്ക് ഇതിൽ ഒരു ആനുകൂല്യവും ലഭിക്കുന്നില്ല. ആകെ കിറ്റും പെൻഷനും തൊഴിലുറപ്പും മാത്രം. ഇവർ സാമ്പത്തികമായും സാമൂഹികമായും ഉയരണം. ഇതിനായി സമൂഹ്യനീതി ഉറപ്പാക്കണം. വൈക്കം സത്യഗ്രഹത്തിന് കാരണമായത് ഗുരുവിനെ വഴിതടഞ്ഞതാണ്. ഇതി​നെതി​രെയുള്ള ടി.കെ. മാധവന്റെ വികാരമാണ് വൈക്കം സത്യഗ്രഹത്തിന് തുടക്കം. ഈ സത്യം തുറന്നു പറഞ്ഞത് മുഖ്യമന്ത്രി പിണറായി വിജയൻ മാത്രമാണ് . മറ്റുള്ളവർക്ക് ഇത് അറിയാമെങ്കിലും വോട്ട് നഷ്ടപ്പെടുമോയെന്ന് ഭയന്ന് പറയുന്നില്ല. എസ്.എൻ.ഡി.പി യോഗം രൂപീകരിക്കാനുള്ള പ്രേരണശക്തിയായത് ഡോ. പല്പുവിനെ ജാതിയുടെ പേരിൽ ആട്ടിയോടിച്ചതാണെന്നും വെള്ളാപ്പള്ളി പറഞ്ഞു.