യൂത്ത് കോൺ. തിരഞ്ഞെടുപ്പ്: വ്യാജ വോട്ടിന് എതിരെ എ.ഐ.സി.സിക്ക് പരാതി

പാലക്കാട്: യൂത്ത് കോൺഗ്രസ് സംഘടനാ തിരഞ്ഞെടുപ്പിൽ വ്യാപകമായി വ്യാജൻമാർ വോട്ട് ചെയ്തതായി പരാതി. ഇന്ത്യൻ തിരഞ്ഞെടുപ്പ് കമ്മിഷന്റെ തിരിച്ചറിയൽ കാർഡ് വ്യാജമായി തയ്യാറാക്കി വോട്ട് ചെയ്തതിന്റെ കൂടുതൽ തെളിവുകൾ പുറത്തു വന്നു.

വ്യാജ തിരിച്ചറിയൽ കാർഡ് നിർമ്മിച്ചത് എങ്ങനെയെന്ന് വ്യക്തമാക്കാൻ അതിന് ഉപയോഗിച്ച മൊബൈൽ ആപ്ലിക്കേഷനും മാതൃകാ വീഡിയോയും പരാതിക്കാർ എ.ഐ.സി.സിക്ക് കൈമാറി. രാഹുൽ ഗാന്ധിയുടെ തിരിച്ചറിയൽ കാർഡ് തയ്യാറാക്കുന്ന മാതൃക വീഡിയോ ഉൾപ്പെടെയാണിത്. .സി.ആർ കാർഡ് എന്ന മൊബൈൽ ആപ്ലിക്കേഷൻ ഉപയോഗിച്ചാണ് വ്യാജ തിരിച്ചറിയൽ കാർഡ് നിർമിച്ചത്. ഇത്തരത്തിൽ തിരഞ്ഞെടുപ്പ് കമ്മിഷന്റെ തിരിച്ചറിയൽ കാർഡ് നിർമ്മിക്കാൻ ഒരു പാസ്പോർട്ട് സൈസ് ഫോട്ടോ മാത്രം മതി. പേരും മേൽവിലാസവും ഉൾപ്പെടെ വിവരങ്ങൾ നൽകിയാൽ 5 മിനിറ്റിനകം യഥാർത്ഥ തിരിച്ചറിയൽ കാർഡിനെ വെല്ലുന്ന വ്യാജ കാർഡ് ആപ്പ് വഴി ലഭ്യമാകും.ഇത്തരത്തിൽ തയ്യാറാക്കുന്ന വ്യാജ പി.വി.സി കാർഡിൽ പ്രിന്റ് എടുക്കാനും കഴിയും. ഇതേ മാതൃകയിൽ ആയിരക്കണക്കിന് തിരിച്ചറിയൽ കാർഡ് തയ്യാറാക്കിയെന്നാണ് പരാതിയിൽ പറയുന്നത്.

ബാംഗ്ലൂർ കേന്ദ്രമായി പ്രവർത്തിക്കുന്ന പി.ആർ.കമ്പനിയാണ് വ്യാജ തിരിച്ചറിയൽ കാർഡ് നിർമ്മിച്ചതെന്നും പരാതിയിൽ വ്യക്തമാക്കുന്നു. രാഹുൽ ഗാന്ധി, കെ സി വേണുഗോപാൽ എന്നിവർക്കും പരാതി നൽകിയിട്ടുണ്ട്.