കൊച്ചി: ഹ്യുണ്ടായിയുടെ കോംപാക്‌റ്റ് എസ്.യു.വിയായ വെന്യൂവിന്റെ പുത്തൻ പതിപ്പ് ജൂൺ 16ന് വിപണിയിലെത്തും. ഡീലർഷിപ്പുകളിലും ഓൺലൈനിലും ബുക്കിംഗിന് കമ്പനി തുടക്കമിട്ടിട്ടുണ്ട്. 21,​000 രൂപയടച്ച് ബുക്ക് ചെയ്യാം.

2019ലാണ് വെന്യൂവിന്റെ ആദ്യ പതിപ്പ് ഹ്യുണ്ടായ് ഇന്ത്യൻ വിപണിയിലെത്തിച്ചത്. തുടർന്ന് വൻ സ്വീകാര്യത നേടിയ വെന്യൂവിന്,​ ഉപഭോക്തൃ താത്പര്യാർത്ഥം ഒട്ടേറെ മാറ്റങ്ങൾ സമ്മാനിച്ചാണ് പുത്തൻ പതിപ്പ് പുറത്തിറക്കുന്നത്.
2020ലും 2021ലും ഇന്ത്യയിൽ ഏറ്റവും വിൽക്കപ്പെടുന്ന എസ്.യു.വി ബ്രാൻഡ് എന്ന പട്ടം ഹ്യുണ്ടായിക്ക് സമ്മാനിച്ചതിൽ വെന്യൂവിന് മികച്ച പങ്കുണ്ടെന്ന് ഹ്യുണ്ടായ് മോട്ടോർ ഇന്ത്യ സെയിൽസ്,​ മാർക്കറ്റിംഗ് ആൻഡ് സർവീസ് ഡയറക്‌ടർ തരുൺ ഗാർഗ് പറഞ്ഞു. വരുംതലമുറ ഡിസൈൻ,​ അതിനൂതന ടെക്‌നോളജി,​ കരുത്തുറ്റ പെർഫോമൻസ് എന്നീ മികവുകളാണ് വെന്യൂവിന് ഹ്യുണ്ടായ് ഉയർത്തിക്കാട്ടുന്നത്. സമാനതകളില്ലാത്തതും ശ്രേണിയിൽ തന്നെ ആദ്യമെന്ന പെരുമയുള്ളതുമായ ഒട്ടേറെ പുത്തൻ ഫീച്ചറുകൾ പുതിയ വെന്യൂവിലുണ്ടാകുമെന്ന് ഹ്യുണ്ടായ് പറയുന്നു.
റിമോട്ടായി വാഹനത്തെ കൺട്രോൾ ചെയ്യാനും സ്‌റ്റാറ്റസ് അറിയാനും സഹായിക്കുന്ന ഹോം ടു കാർ (എച്ച്2സി),​ അലെക്‌സ,​ ഗൂഗിൾ വോയിസ് അസിസ്‌റ്റ്,​ റിമോട്ട് ക്ളൈമറ്റ് കൺട്രോൾ,​ റിമോട്ട് ലോക്ക്/അൺലോക്ക് എന്നിവ അതിലുൾപ്പെടുന്നു. അഞ്ച് വേരിയന്റുകൾ പുത്തൻ വെന്യൂവിന് പ്രതീക്ഷിക്കാം. എൻജിനിലും വിവിധ ഓപ്‌ഷനുകളുണ്ടാകും. വിവിധ ഡ്രൈവിംഗ് മോഡുകളും പ്രതീക്ഷിക്കാം.