മണ്ണെടുപ്പ് ലോറികൾ പാഞ്ഞ് പഞ്ചായത്ത് റോഡ് തകർന്നു

കൊട്ടാരക്കര: അനധികൃത മണ്ണെടുപ്പ് മൂലം റോഡ് തകർന്നതായി ആരോപണം. മൈലം ഗ്രാമ പഞ്ചായത്തിലെ ഇഞ്ചക്കാട് 19-ാം വാർഡിലെ ചെറുവള്ളിൽ ഭാഗം, ചിറവയൽ റോഡ് എന്നിവിടങ്ങളിലൂടെ നിരന്തരം മണ്ണു കടത്തുന്നതുമൂലം റോഡ് പൊട്ടിപ്പിളർന്ന് സഞ്ചാരയോഗ്യമല്ലാതായി.

വയലിനു സമീപത്തു കൂടി 3 മീറ്റർ വീതയിലുള്ള പഞ്ചായത്ത് റോഡാണ് തകർന്നത്. ലക്ഷക്കണക്കിനു രൂപ പഞ്ചായത്ത് പദ്ധതിയിൽ ഉൾപ്പെടുത്തി നിർമ്മിച്ച റോഡ് തകർക്കുന്ന തരത്തിലുള്ള മണ്ണെടുപ്പിനെതിരെ പ്രദേശ വാസികൾ സമരത്തിനൊരുങ്ങുകയാണ്. പ്രദേശത്തു നിന്ന് മണ്ണെടുക്കാൻ അനുവദിക്കില്ലെന്ന നിലപാടിലാണ് നാട്ടുകാർ ഇതു സംബന്ധിച്ച് മുഖ്യമന്ത്രിക്ക് ഉൾപ്പെടെ നിവേദനം നൽകിയിട്ടുണ്ട്.