കളംപിടിച്ച് സ്കൂൾ വിപണി

കോട്ടയം : പുതിയ അദ്ധ്യയനവർഷം ആരംഭിക്കാനിരിക്കെ പുത്തനുടുപ്പും ഫാൻസി ബാഗുകളും കളർഫുൾ കുടകളുമായി സ്‌കൂൾ വിപണി സജീവമായി. നഗരത്തിലെ മിക്ക കടകളും സ്‌കൂൾ സ്‌പെഷ്യൽ കച്ചവടം തുടങ്ങി. വില അല്പം കൂടിയെങ്കിലും കച്ചവടം തകൃതിയാണ്. പുത്തൻ ബാഗും കുടയും ചെരിപ്പും ഉടുപ്പും ധാരാളമായുണ്ട്. ഏതു തിരഞ്ഞെടുക്കണമെന്ന ആശയക്കുഴപ്പമേയുള്ളൂ. കാഴ്ചയുടെ കൗതുകത്തിനപ്പുറം സൗകര്യങ്ങൾ കൂടുതലുള്ള ബാഗുകൾ തിരഞ്ഞെടുക്കാൻ മാതാപിതാക്കൾ കുട്ടികളെ ഉപദേശിക്കുന്നതും കാണാം. ഡോറ, ബെൻ ടെൻ, യുണികോൺ, സ്‌പൈഡർമാൻ, ഡോറിമോൻ, മിക്കി മൗസ്, പിക്കാച്ചു, ഹലോ കിറ്റി ഇങ്ങനെ നീളുന്നു കാർട്ടൂൺ കഥാപാത്രങ്ങളുടെ ബാഗുകളുടെ നിര. പ്ലേസ്‌കൂൾ വിദ്യാർത്ഥികൾക്ക് മൃദുവായതും കാർട്ടൂൺ കഥാപാത്രങ്ങളുടെ മാതൃകയിലുള്ളതും കളർഫുള്ളും ത്രീഡി ചിത്രങ്ങളും അടങ്ങിയ ബാഗുകളുമുണ്ട്. ലഞ്ച് ബോക്‌സ് കൊണ്ടുപോകുന്നതിനായി ഡിസൈനർ പേപ്പർ ബാഗുകളുമുണ്ട്.

കുട കുട
കുട വിപണിയിലാണ് പുത്തൻ ട്രെൻഡുകൾ ഏറെയും. കണ്ണും ചെവിയുമുള്ള കുടകളും വെള്ളം ചീറ്റുന്നവയും മിക്കി മൗസിന്റെയും മൃഗങ്ങളുടെയും മറ്റും ചിത്രങ്ങൾ പതിച്ചവയുമുണ്ട്. 400 രൂപ മുതലാണ് വില. കുടയ്‌ക്കൊപ്പം റെയിൻകോട്ടും തകൃതിയായി വിൽക്കുന്നു. ഈട് നിൽക്കുന്ന തരം ശീലകളുള്ള കുടകൾക്കാണ് ഡിമാൻഡ്.

ഷൂസും യൂണിഫോമും
കൊച്ചുകുട്ടികൾക്കുള്ള ചെരുപ്പും ഷൂസുകളും 250 രൂപ മുതൽ ലഭിക്കും. മൊബൈൽ ഗെയിമുകളുടെ ചിത്രമുള്ള പെൻസിൽ ബോക്‌സിന് 60 മുതൽ 150 രൂപ വരെ നൽകണം. നോട്ട്ബുക്കുകൾക്ക് 50 രൂപ വരെയാകും.

പ്ലാസ്റ്റിക്കിനോട് നോ
പ്ലാസ്റ്റിക് ബോട്ടിലുകൾക്ക് ഇക്കുറി പ്രിയം കുറവാണെന്ന് കച്ചവടക്കാർ പറയുന്നു. പകരം സ്റ്റീൽബോട്ടിലുകളാണ് ഏറെപ്പേരും വാങ്ങുന്നത്. പ്ലാസ്റ്റിക് ലഞ്ച് ബോക്‌സുകൾക്ക് പകരം സ്റ്റീലിന്റെ ലഞ്ച് ബോക്‌സുകൾ ഇത്തവണ കൂടുതലായി എത്തിയിട്ടുണ്ട്.

വില ഇങ്ങനെ

ബാഗ് സാധാരണ മോഡൽ : 350- 900 രൂപ വരെ

കാർട്ടൂൺ മോഡൽ : 699 രൂപ മുതൽ

പ്ലേ സ്‌കൂൾ ബാഗ് : 300 രൂപ മുതൽ.



''വില വർദ്ധനവും ഓൺലൈൻ വിപണിയും സ്‌കൂൾ വിപണിയെ പ്രതികൂലമായി ബാധിച്ചിട്ടുണ്ട്. വരും ദിവസങ്ങളിൽ തിരക്കേറും. 20 ശതമാനം വില വർദ്ധനവാണുള്ളത്. ആകർഷകമായ ഓഫറുകളുമുണ്ട്.

-(ഷെഫീഖ്, വ്യാപാരി)