വെങ്കലം, വെള്ളി, ഒടുവിൽ തനിപ്പൊന്നായി മിയ !

കുന്നംകുളം: കഴിഞ്ഞ രണ്ട് സ്‌കൂൾ കായികമേളകളിലും വെള്ളിയും വെങ്കലവുമായിപ്പോയ മിയാ റോസ് തന്റെ അവസാന സ്‌കൂൾ കായികമേളയിൽ നേടിയെടുത്തത് സ്വർണം. സീനിയർ ഗേൾസിന്റെ 3 കിലോമീറ്റർ നടത്തത്തിലാണ് എറണാകുളം മാതിരപ്പള്ളി ജി.വി.എച്ച്.എസിലെ പ്ലസ് ടു വിദ്യാർത്ഥിനി പൊന്നണിഞ്ഞത്. സമയം 16.20.91 സെക്കൻഡ്.

എട്ടാം ക്ലാസിൽ പഠിക്കവേയാണ് കോഴിക്കോട് കട്ടിപ്പാറ സ്വദേശിനിയായ മിയ നടത്ത മത്സരത്തിലേക്ക് ശ്രദ്ധ കേന്ദ്രീകരിച്ചത്. 2019ൽ കണ്ണൂരിൽ നടന്ന സംസ്ഥാന കായികമേളയിൽ ജൂനിയർ വിഭാഗത്തിലായിരുന്നു അരങ്ങേറ്റം. അന്ന് കോഴിക്കോട് ജില്ലയ്ക്കായി മത്സരിച്ച താരം വെങ്കലം നേടി. മിയയുടെ പ്രകടനം കണ്ട് കായികാദ്ധ്യാപകനായ ജോർജ് ഇമ്മാനുവൽ എറണാകുളം മാതിരപ്പള്ളി സ്‌കൂളിലേക്ക് ക്ഷണിക്കുകയായിരുന്നു. കഴിഞ്ഞ വർഷം ഇറങ്ങിയെങ്കിലും എറണാകുളത്തിനായി വെള്ളി നേടാനേ ആയുള്ളു.

എം.എ കോളേജ് അക്കാഡമിയിലാണ് പരിശീലനം. അവസാന സ്‌കൂൾ മീറ്റിൽ സ്വർണമെഡൽ സ്വന്തമാക്കാനായതിൽ അതിയായ സന്തോഷമുണ്ടെന്ന് മിയ പറഞ്ഞു.