ന്യൂഡൽഹി: ഹരിയാന ഡൽഹിക്ക് അവകാശപ്പെട്ട ജലം തടഞ്ഞുവച്ചിരിക്കുകയാണെന്ന ആരോപണത്തിൽ അരവിന്ദ്​ കെജ്രിവാൾ സർക്കാരിന്​ മറുപടിയുമായി ഹരിയാന ആരോഗ്യമന്ത്രി അനിൽ വിജ്​. ഡൽഹി സർക്കാർ ഉന്നയിക്കുന്ന ആരോപണങ്ങൾ അടിസ്ഥാന രഹിതമാണെന്നും അരവിന്ദ്​ കെജ്​രിവാൾ നുണ പറയുന്നതിലാണ്​ ഡോക്​ടറേറ്റ്​ എടുത്തിരിക്കുന്നതെന്നും അനിൽ പറഞ്ഞു.

ഡൽഹിക്ക്​ അവകാശപ്പെട്ട ജലം വിട്ടുനൽകാൻ ഹരിയാനയ്ക്ക്​ നിർദ്ദേശം നൽകണമെന്നാവശ്യപ്പെട്ട്​ ഡൽഹി ജല ബോർഡ്​ സുപ്രീംകോടതിയെ സമീപിക്കുമെന്ന്​ കഴിഞ്ഞ ദിവസം ജല ബോർഡ്​ വൈസ്​ ചെയർമാൻ രാഘവ്​ ഛദ്ദ അറിയിച്ചിരുന്നു.

ഡൽഹിക്ക്​ അവകാശപ്പെട്ട ജലം ഹരിയാന നൽകുന്നില്ല. യമുനയിലേക്ക്​ ഹരിയാന തുറന്നുവിടുന്ന വെള്ളത്തിന്റെ അളവ് ഏറ്റവും കുറഞ്ഞ തോതിലാണ്​. 1995ൽ നിശ്ചയിച്ചത്​ പ്രകാരമുള്ള വെള്ളം ലഭിക്കാൻ സുപ്രീംകോടതിയെ സമീപിക്കുമെന്നുമായിരുന്നു രാഘവ് ഛദ്ദ പറഞ്ഞത്. ഇതിനെ തള്ളിയായിരുന്നു അനിൽ വിജിന്റെ പ്രതികരണം.

'ആദ്യം എ.എ.പി സർക്കാർ കൊവിഡ്​ രണ്ടാം തരംഗത്തിൽ ആവശ്യത്തിലധികം ഒാക്സിജൻ ശേഖരിക്കുന്നതിനായി തെറ്റായ കണക്കുകൾ അവതരിപ്പിച്ചു. ഇപ്പോൾ അവർ വെള്ളത്തിന്റെ കാര്യത്തിൽ സ്വന്തം തോൽവി മറച്ചുവയ്ക്കാനായി നുണ പറയുന്നു.​ അടിസ്ഥാനമില്ലാത്ത ആരോപണങ്ങൾ അവർ ഉന്നയിച്ചുകൊണ്ടേയിരിക്കുന്നു' -അനിൽ വിജ്​ പറഞ്ഞു. മൺസൂൺ വൈകിയതിനാൽ യമുനയിൽ വെള്ളത്തിന്​ ക്ഷാമമുണ്ട്​. എന്നാൽ ഡൽഹിക്ക്​ അവകാശപ്പെട്ട ജലം നൽകാറുണ്ടെന്നും അനിൽ വിജ്​ പറഞ്ഞു.