സക്കർബർഗ് വൈകാതെ മരണപ്പെടാം; കമ്പനിയുടെ പ്രവർത്തനങ്ങൾ താളംതെറ്റും, റിപ്പോർട്ട് പുറത്തുവിട്ട് മെറ്റ

കാലിഫോർണിയ: ടെക് ഭീമൻ മെറ്റയുടെ സിഇഒ മാർക്ക് സക്കർബർഗ് വൈകാതെ മരണപ്പെട്ടേക്കാമെന്ന് കമ്പനി. അടുത്തിടെ പുറത്തിറക്കിയ സാമ്പത്തിക റിപ്പോർട്ടിലാണ് ഇക്കാര്യം ചൂണ്ടിക്കാട്ടുന്നത്. സക്കർബർഗിന്റെ ജീവിതരീതികളോട് മെറ്റ അതൃപ്‌തി പ്രകടിപ്പിക്കുകയും ചെയ്തു.

സിഇഒ ഏർപ്പെടുന്ന വിനോദങ്ങൾ ഗുരുതരമായ പരിക്കുകൾക്കും മരണത്തിനും ഇടയാക്കുന്നവയാണെന്നാണ് മെറ്റ പറയുന്നത്. മിക്‌സഡ് മാർഷ്യൽ ആർട്‌സ്, അതികഠിനമായ കായിക ഇനങ്ങൾ, വ്യോമ വിനോദങ്ങൾ എന്നിവ ആപത്തുകൾ വിളിച്ചുവരുത്തുന്നവയാണെന്നും ഇത് മെറ്റയ്ക്കും നിക്ഷേകർക്കും പ്രതിസന്ധിയുണ്ടാക്കുമെന്നും റിപ്പോർട്ടിൽ പറയുന്നു. ഏതെങ്കിലും കാരണത്താൽ സക്കർബർഗ് ലഭ്യമല്ലാതായാൽ അത് കമ്പനിയു‌ടെ പ്രവർത്തനങ്ങളെ പ്രതികൂലമായി ബാധിക്കുമെന്നും മെറ്റ കൂട്ടിച്ചേർത്തു.

കഴിഞ്ഞ നവംബറിൽ മാർഷ്യൽ ആർട്‌സ് പരിശീലനത്തിനിടെ പരിക്കേറ്റതിനെത്തുടർന്ന് സക്കർബർഗ് ശസ്ത്രക്രിയയ്ക്ക് വിധേയനായിരുന്നു. അതേസമയം, വലിയ റിസ്‌ക് എന്നാൽ വലിയ പ്രതിഫലം എന്നാണ് കമ്പനിയുടെ ആശങ്കകൾക്ക് സക്കർബർഗ് സമൂഹമാദ്ധ്യമത്തിൽ മറുപടി നൽകിയത്.

സക്കർബർഗ് തന്റെ പുതിയ സംരംഭത്തിന്റെ പേരിലും കഴിഞ്ഞദിവസങ്ങളിൽ ശ്രദ്ധനേടിയിരുന്നു. ടെക്‌നോളജി വിട്ട് കൃഷിയിലേക്കാണ് ശതകോടീശ്വരൻ കണ്ണുവച്ചത്. കന്നുകാലി വളർത്തലാണ് സക്കർബർഗിന്റെ പുതിയ ബിസിനസ്. അമേരിക്കയിലെ ഹവായിലുള്ള കോയിൽ കോലാവു എന്ന സ്ഥലത്താണ് സക്കർബർഗ് കന്നുകാലി കൃഷി നടത്തുന്നത്. ലോകത്തിലെ തന്നെ ഏറ്റവും മികച്ച ബീഫ് ഉത്പാദിപ്പിക്കുകയെന്നതാണ് സക്കർബർഗിന്റെ ലക്ഷ്യം.

കന്നുകാലികൾക്ക് പ്രാദേശികമായുള്ള വിഭവങ്ങളാണ് സക്കർബർഗ് നൽകുന്നത്. മക്കാഡാമിയ പഴവും ഡ്രൈ ഫ്രൂട്ട്‌സും പ്രാദേശികമായി നിർമിക്കുന്ന ബിയറുമാണ് കന്നുകാലികൾക്ക് ഭക്ഷണമായി നൽകുന്നത്. കൃഷിസ്ഥലത്തുതന്നെയാണ് മക്കാഡമിയ ചെടികൾ വളർത്തുന്നത്. കൃഷിയിടത്തിൽ നിന്ന് തീൻമേശയിലേയ്ക്ക് എന്നതാണ് സക്കർബർഗിന്റെ നയം. സക്കർബർഗിന്റെ കന്നുകാലി കൃഷി നിരവധി വിമർശനങ്ങളും ഏറ്റുവാങ്ങിയിരുന്നു.