കമുകറ പുരസ്കാരം എം. ജി. ശ്രീകുമാറിന്

പ്രശസ്ത സംഗീതജ്ഞൻ കമുകറ പുരുഷോത്തമന്റെ സ്മരണയ്ക്കായി കമുകറ ഫൗണ്ടേഷൻ ഏർപ്പെടുത്തിയ 2023 ലെ സംഗീത പുരസ്കാരം പിന്നണി ഗായകൻ എം. ജി ശ്രീകുമാറിന്. പെരുമ്പാവൂർ ജി.രവീന്ദ്രനാഥ് ചെയർമാനും, ഡോ. ദീപ്തി ഓംചേരി ഭല്ല, ഡോ. ആർ. ശ്രീലേഖ, പ്രൊഫ. അലിയാർ എന്നിവർ അംഗങ്ങളുമായ കമ്മിറ്റിയാണ് തിരഞ്ഞെടുത്തത്.
അൻപതിനായിരം രൂപയും പ്രശസ്തി പത്രവും ആർട്ടിസ്റ്റ് ഭട്ടതിരി രൂപകല്പന ചെയ്ത ശില്പവുമടങ്ങുന്നതാണ് അവാർഡ്. മേയ് 20ന് വൈകിട്ട് 6ന് തിരുവനന്തപുരം സെനറ്റ് ഹാളിൽ നടക്കുന്ന ചടങ്ങിൽ പുരസ്കാരം കൈമാറും. 25-ാമത് പുരസ്കാര സമർപ്പണ ചടങ്ങാണ് സംഘടിപ്പിക്കുന്നത്. ചടങ്ങിനോടനുബന്ധിച്ച് ആവണി പൊന്നൂഞ്ഞാൽ എന്ന പേരിൽ എം.ജി ശ്രീകുമാർ, കമുകറ പുരുഷോത്തമൻ എന്നിവർ പാടി അനശ്വരമാക്കിയ ഗാനങ്ങൾ പ്രശസ്ത ഗായകർ അവതരിപ്പിക്കും.