അംഗീകാര നിറവിൽ ടൊവിനോയുടെ അദൃശ്യ ജാലകങ്ങൾ

ടൊവിനോ തോമസ് കേന്ദ്ര കഥാപാത്രമാക്കി ഡോ. ബിജു സംവിധാനം ചെയ്ത അദൃശ്യ ജാലകങ്ങൾ ഇരുപത്തിയേഴാമത് ടാലിൻ ബ്ളാക്ക് നൈറ്റ്സ് ഇന്റർനാഷണൽ ഫിലിം ഫെസ്റ്റിവലിൽ പ്രദർശിപ്പിച്ചു. ഇതോടെ ഫിലിം ഫെസ്റ്റിവലിന്റെ ഒൗദ്യോഗിക മത്സര വിഭാഗത്തിൽ വേൾഡ് പ്രീമിയർ നടത്തിയ ആദ്യ മലയാള ചിത്രമായി അദൃശ്യ ജാലകങ്ങൾ ചരിത്രം സൃഷ്ടിച്ചിരിക്കുകയാണ്. മനുഷ്യരെ എങ്ങനെ നിസഹായരാക്കുന്നു എന്നതാണ് ചിത്രത്തിന്റെ പ്രമേയം. ആഖ്യാന മികവുകൊണ്ടും അഭിനേതാക്കളുടെ മികച്ച പ്രകടനം കൊണ്ടും മികച്ച പ്രേക്ഷക നിരൂപക പ്രശംസകളാണ് ചിത്രത്തിന് മേളയിൽ നിന്ന് ലഭിച്ചത്. നിമിഷ സജയനും ഇന്ദ്രൻസും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. മേളയിൽ ഇൗവർഷം തിരഞ്ഞെടുക്കപ്പെട്ട ഏക ഇന്ത്യൻ ചിത്രമാണ് അദൃശ്യ ജാലകങ്ങൾ.

മൂന്നുതവണ ഗ്രാമി അവാർഡ് നേടിയ റിക്കി കേജ് ആണ് സംഗീതം. സംസ്ഥാന പുരസ്കാര ജേതാവ് അജയൻ അടാട്ട് ആണ് ശബ്ദലേഖനം. അന്തരിച്ച പ്രശസ്ത ഛായാഗ്രാഹകൻ എം.ജെ. രാധാകൃഷ്ണന്റെ മകൻ യദു രാധാകൃഷ്ണനാണ് ഛായാഗ്രഹണം. സംവിധായകൻ ഡോ. ബിജു, നിർമ്മാതാവ് രാധിക ലാവു. ടൊവിനോ തോമസ് എന്നിവർ എസ്‌തോണിയയിൽ നടന്ന വേൾഡ് പ്രീമിയറിൽ പങ്കെടുത്തു. എല്ലാനാർ ഫിലിംസിന്റെ ബാനറിൽ രാധിക ലാവും മൈത്രി മൂവി മേക്കേഴ്സിന്റെ ബാനറിൽ നവീൻ യേർനേനിയും, വൈ. രവിശങ്കറും ടൊവിനോ തോമസ് പ്രൊഡക്ഷൻസിന്റെ ബാനറിൽ ടൊവിനോ തോമസും ചേർന്നാണ് നിർമ്മാണം.