തിരുവനന്തപുരം: പൊലീസിന്റെ ഹൈവേ പട്രോൾ വിഭാഗത്തിനായി രണ്ട് ഇലക്ട്രിക് കാറുകൾ വാങ്ങാൻ ടെൻഡർ ക്ഷണിച്ചു. ചെലവ് 32.95 ലക്ഷം രൂപ. 15 വർഷത്തിലധികം പഴക്കമുള്ള പെട്രോൾ-ഡീസൽ വാഹനങ്ങൾക്ക് പകരമാണ് പരീക്ഷണാടിസ്ഥാനത്തിൽ വാങ്ങുന്നത്. ഇന്ധനച്ചെലവടക്കമുള്ള ഭാരിച്ച ബാദ്ധ്യത ഒഴിവാക്കാനും കേന്ദ്ര, സംസ്ഥാന സർക്കാരുകളുടെ ഇ-മൊബിലിറ്റി പദ്ധതിയുടെ ഭാഗവുമായാണിത്.

നിലവിൽ മൂന്ന് ഡസനോളം വാഹനങ്ങൾ ഹൈവേ പൊലീസിനുണ്ട്. എന്നാൽ കാലപ്പഴക്കവും വിശ്രമമില്ലാത്ത ഓട്ടവും കാരണം പല വാഹനങ്ങളും സഞ്ചാരയോഗ്യമല്ല. പരീക്ഷണം വിജയിച്ചാൽ സ്റ്റേഷനുകളിലേയ്ക്കടക്കം കൂടുതൽ ഇ- വാഹനങ്ങൾ വാങ്ങും. അതേസമയം, വ്യാപകമായി ചാർജിംഗ് സ്റ്റേഷനുകളില്ലാത്തതും ചാർജിംഗിന് കൂടുതൽ സമയമെടുക്കുന്നതും അടിയന്തരഘട്ടങ്ങളിൽ എത്രയുംവേഗം ഓടിയെത്തേണ്ട ഹൈവേ പട്രോൾ സംഘത്തിന് ഇത് തിരിച്ചടിയാകുമോ എന്ന ആശങ്ക ചില കേന്ദ്രങ്ങളിൽ നിന്ന് ഉയരുന്നുണ്ട്.