ജലീലിനെതിരായ ഹർജി : ഡൽഹി കോടതി റിപ്പോർട്ട് തേടി

ന്യൂഡൽഹി: കാശ്മീരുമായി ബന്ധപ്പെട്ട വിവാദ പരാമർശത്തിൽ കെ.ടി.ജലീൽ എം.എൽ.എക്കെതിരായ പരാതിയിൽ ചൊവ്വാഴ്ചയ്ക്കകം നടപടി സംബന്ധിച്ച റിപ്പോർട്ട് സമർപ്പിക്കാൻ ഡൽഹി തിലക് മാർഗ് പൊലീസ് സ്റ്റേഷനിലെ എസ് എച്ച്.ഒയോട് റോസ് അവന്യു കോടതി അഡി. മെട്രോപൊളിറ്റൻ മജിസ്ട്രേറ്റ് ഹർജീത് സിംഗ് ജസ്പാൽ നിർദ്ദേശിച്ചു. അഭിഭാഷകനായ ജി.എസ് മണി നൽകിയ ഹർജിയിലാണ് നടപടി. സ്റ്റേഷനിൽ നൽകിയ പരാതിയുടെ പകർപ്പ് ഡൽഹി പൊലീസ് കമ്മിഷണർക്ക് കൈമാറിയിട്ടും നടപടി സ്വീകരിക്കുന്നില്ലെന്ന് കാട്ടിയാണ് കോടതിയെ സമീപിച്ചത്. അതേസമയം,​ ജലീലിനെതിരായ പരാതിയെക്കുറിച്ച് അന്വേഷിക്കാൻ സബ് ഇൻസ്പെക്ടർ രാഹുൽ രവിയെ നിയോഗിച്ചെന്ന് ജി.എസ് മണിയെ ഡൽഹി പൊലീസ് അറിയിച്ചു. ജലീലിനെതിരെ രാജ്യദ്രോഹക്കുറ്റം ഉൾപ്പെടെ ചുമത്തി കേസ് എടുക്കണമെന്നാണ് പരാതിയിലെ ആവശ്യം.